Դիանա Հարությունյան, Sputnik.
Օրենքի պահանջով սննդամթերքը սպառողին պիտի հասնի ավելի մաքուր ու սանիտարահիգիենիկ պայմաններում: Սանիտարական անձնագիր չունենալ և հաց տեղափոխելը սեպտեմբերի 1-ից 100-300 դրամ տուգանք է արժենալու:
«Հերթական շոուն է. թող գա սեպտեմբերի 1-ը, կտեսնենք»,- «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը Սննդի անվտանգության պետական ծառայության այս նախաձեռնությունն, իհարկե, դրական է գնահատում, բայց միևնույն է, վստահ չէ, որ սննդամթերքը սանիտարահիգիենիկ պայմաններով տեղափոխելու գաղափարն իրականություն կդառնա:
«Պետք չէ տանել, նկարել, թե ինչքան լավ մեքենաներ կան: Ո՞վ չգիտի, որ մինչև հիմա էլ կային բարեխիղճ, լավ կահավորված փոխադրամիջոցներ ունեցող տնտեսվարողներ: Ասենք` անձնագիրը տվեցին, բայց պարզվեց` մեքենան չի համապատասխանում նորմերին, ո՞վ է կրելու դրա պատասխանատվությունը՝ Սննդի անվտանգության ծառայությունը, թե՞ տնտեսվարողը: Չէ՞ որ անձնագիրը նրան հենց նշյալ կառույցն է տվել»,-հարցերն է շարադրում սպառողների շահերի պաշտպանը:
Մի քանի օր առաջ լրագրողների հետ հանդիպմանը Սննդի անվտանգության պետական ծառայության որակի հսկողության տեսչության պետ Վահե Դանիելյանը վստահեցրեց՝ վերահսկողությունն այդպիսի անձնագրերով ավելի հեշտ է լինելու: Իսկ մեքենաներ ձեռք բերելու հարցում իրենք օգնելու են տնտեսվարողներին:
Նշեց նաև, որ բանակցություններ են վարել ֆինանսական երկու կառույցների՝ ԱՐԱՐԱՏԲԱՆԿ ԲԲԸ-ի և «ԱԳԲԱ լիզինգ» ՓԲԸ-ի հետ: Ձեռք բերված պայմանավորվածության համաձայն՝ տնտեսվարողները համապատասխան մասնագիտացված փոխադրամիջոցներ ձեռք կբերեն առավել բարենպաստ և մատչելի պայմաններով:
«Ավելի լավ չէր լինի՞, եթե ստեղծվեր մի կառույց` ոչ պետական, որն ամեն օր կստուգեր գիծ մտնող մեքենան: Համապատասխանո՞ւմ ես՝ տեղափոխի՛ր, չէ՝ գնա, թերությունդ վերացրու: Թե չէ այսպես անձնագիրը կտան, հետո ինչպես կստուգեն,- ասում է Պիպոյանն ու առաջարկում համբերել մի փոքր, — ամեն բան ջրի երես դուրս կգա ժամանակի ընթացքում»:
Մինչ այդ արդեն 37 փոխադրամիջոց ստացել է իր սանիտարական անձնագիրը: Դրանք տրամադրվում են մեկ տարի ժամկետով և անվճար:
Օրենքը պետական գնումների շրջանակում կգործի սեպտեմբերի 1-ին, առևտրի իրականացման վայրերի համար՝ նոյեմբերի 1-ից, իսկ հանրապետության բոլոր մարզերում տնտեսվարողների համար փոխադրամիջոցի սանիտարական անձնագիր ունենալը պարտադիր կդառնա 2018 թվականի ապրիլի 1-ից: Սննդամթերքի այլ ոլորտներում կարգը կսկսի գործել 2020 թվականի հուլիսի 1-ից:
Արդյո՞ք սանիտարական անձնագիրն է այն երաշխիքը, որ հացը, միսը և մյուս մթերքները մեզ հասնեն մաքուր վիճակում, դժվար է ասել:
