ԵՐԵՎԱՆ, 18 օգոստոսի – Sputnik. «Վեոլիա ջուր» ընկերությունը հույս ունի ջրի սակագների բարձրացման հաշվին արդիականացել համակարգը, Sputnik Արմենիային ասաց «Վեոլիա ջուր» ընկերության մամուլի քարտուղար Մուրադ Սարգսյանը։
Նրա խոսքով` «Վեոլիան» լուրջ պարտականություններ է ստանձնել կառավարության առաջ։ Այդ պատճառով էլ ընկերությունն իրեն թույլ է տալիս տնտեսական ու ֆինանսական առումով բավականին խիստ քաղաքականություն վարել, որպեսզի նվազեցնի ծախսերն ու մեծացնի եկամուտները, նշեց Սարգսյանը։
«Դա պետք է, որպեսզի կարողանանք կատարել մեր պարտականությունները պետության առջև, նաև կարողանանք ներդրումներ անել», – ասաց Սարգսյանը։
Բյուջե գնացող «Վեոլիայի» վճարումների ընդհանուր չափը կկազմի տարեկան մոտ 9,5 միլիոն դոլար։ Բացի այդ, ըստ Սարգսյանի, ներդրումների չափը 15 տարվա ընթացքում կկազմի մոտ 37,5 միլիարդ դրամ։
«Պետության համար դա տնտեսական լուրջ առաջընթաց է», – նշեց «Վեոլիա ջուր» ընկերության մամուլի քարտուղարը։
Ընկերությունը նախատեսում է մի քանի տարվա ընթացքում մեծ գումարներ ներդնել համակարգում և աշխատանքն ավելի արդյունավետ դարձնել (նվազեցնել կորուստները, էլեկտրաէներգիայի ծախսերը), իսկ ավելացված գումարը ծախսել մարզերում ջրամատակարարման համակարգերը բարելավելու նպատակով։
«Պետությունն իր հերթին պարտավորվել է մեր ներդրումներին ավելացնել ևս 200 միլիոն դոլար։ Դրա համար սկզբում գինը պետք է աճի, հետո նվազի», – ասաց Սարգսյանը։
Նրա խոսքով` առանց սակագների բարձրացման անհնար կլինի ներդրում կատարել ու արդիականացնել ջրամատակարարման համակարգը։
Անդրադառնալով ձրի կորուստներին ու ապօրինի միացումներին` Սարգսյանը նշեց, որ ընկերությունը չի կարող ստուգել բոլոր բաժանորդներին, հատկապես գյուղերում։ Դրա համար նոր խողովակների տեղադրումը պետք է միանգամից երկու հարց լուծի, իսկ դրա համար հարկավոր են ռեսուրսներ, որոնք ընկերությունը հույս ունի ստանալ գների «ժամանակավոր» բարձրացման հաշվին։
«Քաղաքացին պետք է իմանա, որ իր վճարած գումարն ուղղվելու է ջրամատակարարման համակարգի բարելավմանը», – ընդգծեց Սարգսյանը։
Այժմ 1 խմ ջուրն արժե 180 դրամ, իսկ ընկերությունն առաջարկում է այն հասցնել 194.3 դրամի: Խոշոր բաժանորդների համար սակագինը 54 դրամ է, ընկերությունն առաջարկում է այն հասցնել 58.3 դրամի:
«Վեոլիա Ջուր» ՓԲԸ-ն դիմել է Հանրային ծառայությունները կարգավորող հանձնաժողով խմելու ջրի մատակարարման և ջրահեռացման (կեղտաջրերի մաքրման) սակագների ճշգրտման հայտով: ՀԾԿՀ-ն հայտն ընդունել է ուսումնասիրության:Համեմատության համար նշենք` Ադրբեջանում մեկ խմ ջուրն արժե 30 ցենտ (Բաքվում, Սումգայիթում և մարզերում` 26 ցենտ), Վրաստանում` մոտ 1 ցենտ (կամ մեկ անձի համար ամսական 1,5 դոլար, եթե հաշվիչ չկա)։
Նախկինում «Վեոլիա ջուր» ընկերությունը ջրով էր ապահովում էր միայն Երևանը, սակայն 2017 թվականի հունվարի 1–ից սպասարկում է ամբողջ Հայաստանին։ Ընդ որում, հունվարի 1–ից խմելու ջրի սակագինը բարձրացել էր Հայաստանի գրեթե բոլոր մարզերում։ Ամբողջ հանրապետության տարածքում ընդունվել է մեկ սակագին` 1 խմ–ի դիմաց 180 դրամ։
