ԵՐԵՎԱՆ, 19 օգոստոսի — Sputnik․ Խաղողի մթերմանը մնացել է երկու-երեք շաբաթ, Երևանում հրավիրված ասուլիսի ժամանակ հայտնեց Հայաստանի խաղողագործների միության նախագահ Արտակ Սարգսյանը։
Նրա խոսքով՝ կառավարությունը խաղողագործությունը գյուղատնտեսության գերակա ճյուղ է հայտարարել, բայց բացթողումներն այս ոլորտում շատ են, ու պետք է դրանք վերացնել միահամուռ ուժերով։
«Շատ արդիական է պայմանագրերի խնդիրը։ Արտադրողի (գյուղացու) ու մշակող ընկերության միջև փոխշահավետ պայմանագիրն ինքնաբերաբար կլուծի մի շարք խնդիրները։ Սակայն շատ խաղողագործներ պայմանագրեր չեն կնքում», — նշեց Սարգսյանը։
Փորձագետի կարծիքով՝ լավ օրինակ կարող է ծառայել Երևանի կոնյակի գործարանը, որը երկարաժամկետ ու կարճաժամկետ պայմանագրեր է կնքում արտադրողների հետ։
Նա նշեց, որ առավել արդիական են ոռոգման ու նաև խաղողի հիվանդության խնդիրները։
«Այս տարին երաշտային էր, և ջուրը պարզապես չէր հասնում շատ տարածքներ։ Իսկ Արարատյան դաշտավայրում ոռոգումը որոշակի գրաֆիկով է իրականացվում, ինչն այնքան էլ ճիշտ չէ», — ասաց Սարգսյանը։
Նա նշեց, որ ցուրտ ձմեռը նույնպես իր ազդեցությունը կունենա բերքի վրա։
«2015 թվականի արդյունքները հիասթափեցրին գյուղացիներին (2015 թվականին «Վինար» ընկերությունը Քաղցրաշենի գյուղացիներին չվճարեց խաղողի բերքի դիմաց — խմբ․), ու շատ գյուղացիներ հողով չծածկեցին վազերը։ Իսկ ձմեռը շատ ցուրտ էր, տուժեցին նաև պաշտպանված այգիները։ Հետևաբար, ցրտի պատճառով խաղողի մեծ կորուստներ եղան։ Իմ կանխատեսումներով, 2017 թվականին խաղողի բերքը 30-35 տոկոսով պակաս կլինի», — ընդգծեց խաղողագործը։
Խաղողագործների միության նախագահը նաև նշեց, որ «Վինար» ընկերությունը դեռ չի վճարել գյուղացիների գումարն ու այդ հարցն օդում է կախված։ Պարտքը կազմում է 30 միլիոն դրամ։ Չնայած պետության ու իրավապահ մարմինները միջամտությանը, պարտքը մինչ այժմ չի մարվել։
Նրա խոսքով՝ խաղողի նվազագույն գինն այս տարի կկազմի 120-125 դրամ` մեկ կգ-ի համար։ Ընդ որում՝ ավելի քիչ բերք տվող տեսակները մի փոքր ավելի թանկ կարժենան։
Սարգսյանը նշեց, որ այժմ գյուղատնտեսության ապահովագրության փորձնական ծրագիր է ներդրվում, որը կօգնի լուծել բնական աղետների հետ կապված խնդիրները։
