ԵՐԵՎԱՆ, 18 օգոստոսի – Sputnik. Խորովածի միջազգային փառատոնը իններորդ անգամ Հայաստանում կհավաքի այդ ուտեսի սիրահարներին։ Փառատոնն ընդլայնում է սահմանները, տուրիստական գործակալություններում հերթեր են գոյանում։
«Ռուսական, վրացական, բելառուսական տուրիստական գործակալություններն ուղևորություններ են վաճառում դեպի Հայաստանի խորովածի փառատոն։ Հյուրանոցներում ու հյուրատներում տեղեր գրեթե չեն մնացել», – Sputnik Արմենիա մուլտիմեդիոն մամուլի կենտրոնում ասաց «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը։
Նրա խոսքով` այս տարի հետաքրքրությունը փառատոնի նկատմամբ իսկապես աննախադեպ է։ Փառատոնի նպատակն է Հայաստանում զարգացնել զբոսաշրջությունը։ Այն տեղի կունենա օգոստոսի 20–ին, Ախթալայի ամրոցի տարածքում։
Չի բացառվում, որ շուտով խորովածի հայ կազմակերպիչներին միանան նաև վրացի գործընկերները։
«Փառատոնը միջազգային է դարձել։ Այս տարի այն ավելի մեծ հետաքրքրություն է առաջացրել։ Շատերը Հայաստան են գալիս միայն խորովածի փառատոնի համար», – ասաց ՀՀ Զբոսաշրջության պետական կոմիտեի նախագահի առաջին տեղակալ Մեխակ Ապրեսյանը։
Խորովածի փառատոնի մասնակիցներին ու հյուրերին հագեցած մշակութային ծրագիր է սպասում։ Փառատոնի գեղարվեստական ղեկավար Անդրե Սիմոնյանը նշեց, որ Ախթալայում կենդանի երաժշտություն է հնչելու, ելույթ են ունենալու երաժիշտներ Հայաստանից ու Անգլիայից։
Բացի այդ, ստեղծագործական խումբը, որի անդամները տարբեր երկրներից են` Հայաստանից, ԱՄՆ–ից, Ավստրալիայից ու Անգլիայից, Ախթալայում նկարահանումներ է անցկացնելու` «Armenia Uncovered» («Բացահայտելով Հայաստանը») վավերագրական ֆիլմի համար, որը պատմելու է Հայաստանի հարուստ պատմության ու մշակույթի մասին։
Անցած տարի փառատոնն անցկացվում էր սեպտեմբերին։ Սակայն կազմակերպիչների որոշմամբ այսուհետ այն կանցկացվի օգոստոսի երրորդ կիրակի օրը։
