ԵՐԵՎԱՆ, 25 հուլիսի — Sputnik. Խորովածի 9-րդ միջազգային փառատոնն այս տարի առանձնահատուկ կլինի, Sputnik Արմենիա մամուլի կենտրոնում ասաց «Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանը։
Նրա խոսքով` նախատեսվում է օգոստոսի 19-ին խորովածի միջազգային մրցույթ անցկացնել, իսկ հաջորդ օրը կմեկնարկի Խորովածի 9-րդ միջազգային փառատոնը։
«Օգոստոսի 19-ին մենք Խորովածի միջազգային միության համանախագահ Արտեմ Ենգոյանի հետ ուզում ենք խորովածի միջազգային մրցույթ կազմակերպել։ Իսկ ինչ վերաբերում է բուն փառատոնին, այն տարբերվելու է ինչպես իր գեղարվեստական մասով, այնպես էլ մասնակիցների ավելի լայն աշխարհագրությամբ։ Օրինակ` այս տարի փառատոնին մասնակցելու համար Վրաստանից և Ռուսաստանից թիմեր են ժամանել», – ասաց Մամուլյանը։
Նա ավելացրեց, որ հյուրերին հետաքրքիր մշակութային ծրագիր է սպասվում։ Փառատոնի շրջանակներում ելույթ կունենա թուրքահայ երգչուհի Սիբիլը։
«Փառատոնն անցկացվելու է Ախթալայի մարզադաշտի տարածքում։ Սա թույլ կտա փառատոնի մասնակիցներին և այցելուներին լուծել ավտոկայանատեղիի հարցը, ինչպես նաև ավելի շատ թվով տաղավարներ տեղադրել։ Այս տարի դրանց թիվը 30-ից ավել կլինի։ Իսկ այս տարվանից սկսած օգոստոսի վերջին կիրակին խորովածի միջազգային օր կհայտարարվի», – ավելացրեց խոհարարը` նշելով, որ Ախթալան այսուհետ կդառնա խորովածի համաշխարհային մայրաքաղաք։
Ինչ վերաբերում է մեզ մոտ խոհարարական ավանդույթների զարգացման աստիճանին, Մամուլյանը նշեց, որ մենք տարածաշրջանի այլ երկրներից հետ չենք մնում, մի շարք ցուցանիշներով նույնիսկ առաջ ենք։ Այդ թվում` ազգային խոհարարական ավանդույթների պահպանման առումով։
ՀՀ Զբոսաշրջության պետական կոմիտեի նախագահի առաջին տեղակալ Մեխակ Ապրեսյանն էլ նշեց, որ խորովածի միջազգային փառատոնը հաջողակ ու կայացած փառատոներից մեկն է։
«Այն իրադարձություն է դարձել ոչ միայն մեր հայրենիքում։ Մենք աշխատելու դեռ տեղ ունենք, սակայն պետք է նշել, որ որոշ օտարերկրյա տուրօպերատորներ խորովածի միջազգային փառատոնը ներառել են հետաքրքիր միջոցառումների ցանկում։ Այս տարի փառատոնի ծրագիրը հագեցած կլինի», – ավելացրեց նա։
«Խորովածի միջազգային միության» համանախագահ Արտեմ Ենգոյանն իր հերթին նշեց, որ այս տարվա ծրագրերում է նաև խորովածի առաջին մրցույթի անցկացումը (օգոստոսի 19), որը կհամապատասխանի միջազգային չափորոշիչներին։
«Մեզ մոտ լավ պատրաստված թիմեր կժամանեն Լատվիայից, Ավստրիայից և Ռուսաստանից։ Մրցույթը տարբերվում է նրանով, որ պետք է 5 տեսակի խորոված պատրաստել և ժամանակային սահմանափակում է դրվելու։ Մասնակիցների աշխատանքները կգնահատի խիստ ժյուրին։ Իսկ «գնահատողները» շատ են լինելու», – ավելացրեց Ենգոյանը։
Միջոցառման անցկացմանն աջակցում են Լոռու մարզպետարանը, Ախթալայի քաղաքապետարանը, ինչպես նաև Զբոսաշրջության պետական կոմիտեն, երիտասարդ կանանց միությունն ու միջազգային տնտեսական ինտեգրման և բարեփոխումների նախարարությունը։
