ԵՐԵՎԱՆ, 16 օգոստոսի – Sputnik. Հայաստանի ու Ռուսաստանի իշխանությունները մինչ օգոստոսի 20–ը կքննարկեն վարորդական վկայականների փոխադարձ ճանաչման հարցը, Sputnik Արմենիային հայտնեցին Եվրասիական տնտեսական հանձնաժողովի մամուլի ծառայությունից։
2017 թվականի հունիսի մեկից այլ երկրների վարորդական իրավունք ունեցող քաղաքացիներն այլևս իրավունք չունեն Ռուսաստանում պրոֆեսիոնալ վարորդ աշխատել։
Օրենքն ընդունվել է Ռուսաստանի ճանապարհներին օտարերկրյա քաղաքացիների մասնակցությամբ ՃՏՊ–երի թվի աճի հետ կապված։ Օրենքի խախտման ու առանց ռուսական վարորդական վկայականների անձանց տրանսպորտային միջոցների վարելու իրավունք տրամադրելու համար պաշտոնյաները կտուգանվեն 50 հազար ռուբլով։
«Նման փաստաթղթի ստեղծումը դեռ պետք է քննարկվի։ Այն դեռ գոյություն չունի, այդ պատճառով վաղ է ասել, երբ այն ուժի մեջ կմտնի։ Մինչ օգոստոսի 20–ը Հայաստանն ու Ռուսաստանը պետք է քննարկեն այդ հարցը», – հայտնեցին ԵՏՀ մամուլի ծառայությունից։
ԵԱՏՄ երկրների տված վարորդական վկայականների փոխադարձ ճանաչման հարցը քննարկվել է Եվրասիական միջկառավարական խորհրդի նիստին, որը տեղի է ունեցել Աստանայում օգոստոսի 14–ին։
Հայաստանի ու Ռուսաստանի վարչապետները հանձնարարել են կառավարություններին մինչ 2017 թվականի օգոստոսի 20–ը խորհրդատվություններ անցկացնել երկու երկրների տարածքում տրված ազգային կամ միջազգային վարորդական վկայակաների փոխադարձ ճանաչման մասին։
