ԵՐԵՎԱՆ, 16 օգոստոսի — Sputnik. «Մոսկվա» կինոթատրոնի կարմիր դահլիճում օգոստոսի 18-ին, ժամը 20։00-ին կկայանա երգչուհի Լիլիթ Պիպոյանի հեղինակային մենահամերգը։ Երգչուհին խոստովանում է` պաստառների վրա չի նշել, թե ինչ խորագիր ունի համերգը կամ ում է նվիրված։ Բայց լրագրողների հետ զրույցում չթաքցրեց, որ մենահամերգը նվիրված է հոր` վաստակավոր նկարիչ Սուրեն Պիպոյանի 95-ամյակին։
«Իմ հայրը եղել է նկարիչների միության ակտիվ մասնակից, նա անցել է մի մեծ ճանապարհ, սոցռեալիստական լուրջ որակի նկարներ ուներ, բայց դրանք ցրված են այստեղ-այնտեղ, չեմ կարողանում գտնել»,-այսօր հրավիրված ասուլիսի ժամանակ հայտնեց երգչուհին։
Հիմա Սուրեն Պիպոյանի արվեստանոցում առկա է մոտ 50 նկար։ Մյուսների մասին տեղեկություն չունի։ Առկա են մասնավոր հավաքածուներում, կամ դրանց հետքը կորել է 90-ականների մութ ու ցուրտ տարիներին։
«Նրա փափուկ, հին, բաշինջաղյանական գույներով նկարները սքանչելի են։ Հետո նա ձեռք բերեց խիստ ոճ, չնայած հումորով մարդ էր, բայց շատ դաժան կյանք էր ապրել, դա արտահայտվում է նրա ոճի մեջ։ Կյանքի վերջում հայրս ավելի չորացրեց ու սկսեց նկարել պայծառ նկարներ»,- պատմեց Լիլիթ Պիպոյանը։
Նրա խոսքով` այն, որ հոր մասին մինչ օրս շատերը չեն լսել, նրա` խիստ համեստ լինելու պատճառով էր։ Ինչպես դուստրն է խոստովանում, իրեն գովել, պրոպագանդել չէր սիրում։
Այսօր Սուրեն Պիպոյանի արվեստանոցում հարմար պայմաններ չկան` նկարներն ամռանը «շոգում» են, ձմռանը` «մրսում»։
Ինչ վերաբերում է մենահամերգին, Լիլիթ Պիպոյանն այն ուշացած չի համարում։ Սա նրա սիրո խոստովանությունն է հորը։
