Արման Վանեսքեհյան, Sputnik.
Ի՞նչ է իրենից ներկայացնում ռազմական անօդաչու թռչող սարքը: Այն ահարկու ժամանակակից զենք է, առանց որի այսօր մոլորակում, երևի թե, չի ընթանա ոչ մի ռազմական բախում:
Հայտնի է, որ աշխարհի բոլոր երկրները փորձում են թարմացնել իրենց զինանոցում առկա անօդաչու թռչող սարքերի շարքը: Արտադրողներից գնում են նոր, առավել արդյունավետ մոդելներ:
Սակայն, խոսելով ժամանակակից բարձր տեխնոլոգիական զենքի մասին, պետք է ասել, որ ինչպես յուրաքանչուր զենքի, այնպես էլ անօդաչուների վաճառքն ունի իր առանձնահատկությունները, յուրահատկությունները և նրբությունները:
Իրականում, այսօր անօդաչու արտադրվողները կանգնել են հաճախորդների և առևտրի ծավալների համար կատաղի ճակատամարտի առաջ: Յուրաքանչուր տեղեկությունն այդ համատեքստում, որն ուղղակիորեն կամ անուղղակիորեն կապված է ժամանակակից զենքի կոնկրետ տեսակի հետ, պետք է դիտել միայն զենքի համաշխարհային շուկայում մրցակցության տեսանկյունից:
Թվում է` օրերս իսրայելական ընթերցողներին «ուրախացրած» տեղեկությունները, հենց այդ շարքից են:
Հիշեցնեմ, որ խոսքն այն մասին է, որ պատվիրակության ղեկավարները՝ իսրայելական ռազմական անօդաչուներ արտադրող Aeronautis ընկերության ներկայացուցիչներն, անձամբ ուղարկել են վաճառվող Orbiter–1К տեսակի ապարատների նմուշները հայկական բանակի դիրքեր և հարված են հասցրել մեր դիրքերի մոտ: Եվ արել են այն բանից հետո, երբ անօդաչուների օպերատորները հրաժարվել են իրագործել դա, հետևելով իսրայելական օրենսդրությանը:
Միգուցե արտադրող Aeronautis ընկերությունը հիմա բանակցություններ է անցկացնում իր անօդաչուների հերթական խմբաքանակը վաճառելու համար և այս ամենի միջոցով ուղղակի հիշեցնում է իր մասին:
Հիշեցնենք, որ ընկերության արտադրանքը էֆեկտիվ կերպով կիրառվել է հայ-ադրբեջանական բախումների ժամանակ, երբ ապրիլյան պատերազմի ժամանակ անօդաչուն խոցել է կամավորներին տեղափոխող ավտոբուսը:
Գուցե նման տեղեկատվություն տարածել է ադրբեջանական կողմը, որը միտված է ցույց տալ, ասեք, ԵԱՀԿ Մինսկի խմբի համանախագահներին, որ հայ-ադրբեջանական շփման գծում խնդիրը չի հարթվի միայն դիպուկահարների հեռացմամբ և հատուկ մեխանիզմների տեղադրմամբ: Կան նաև ուրիշ մեթոդներ՝ պարբերական հարվածներ հասցնել հակառակորդի դիրքերին:
Հայտնի է, որ ադրբեջանական կողմը չի համաձայնվում համապատասխան սարքավորումներ տեղադրել, որոնք իրավիճակի սրացման դեպքում կարող էին օգնել համանախագահներին որոշել`ով է առաջին է խախտել հրադադարի ռեժիմը:
Այդ տեսանկյունից շատ հարմար է իսրայելական, հետո միջազգային ԶԼՄ-ներում հայտնված անօդաչուների օպերատորների հետ կապված իրավիճակը: Նա ավելորդ անգամ անուղղակիորեն հիշեցնում է անօդաչուների առկայության մասին: Նրանց ֆիքսել շատ ավելի դժվար կլինի, քան, ասենք, դիվերսանտներին կամ դիպուկահարներին:
