Արմենուհի Մխոյան, Sputnik.
Գյումրիի մանկատան նախկին սանը, ով այժմ սովորում է Կրակովի պետական համալսարանում, գտել է իր ծնողներին: «Համացանցով են գտել, իմացել ու գրել էին։ Թե ինչպե՞ս ու ինչու՞ հենց հիմա՝ չեմ կարող այս պահին ասել, բայց կարևորն այն է, որ գտել են»,- Sputnik Արմենիայի թղթակցի հետ կիսելով ուրախությունը նշեց Խորենն` ավելացնելով, որ ծնողների հետ խոսել է նաև տեսազանգով (skype):
«Դեռ շատ բաներ չեմ հարցրել, ու շատ թեմաների մասին չենք խոսել, կարևորը հիմա դա չէ, այլ այն, որ գտել եմ նրանց: Ես իրենց շատ եմ սիրում: Այս օրվան շատ եմ սպասել, որ իրենց ասեմ, որ ես կամ»,-ասում է Խորենն ու ուրախությամբ ավելացնում, որ քույր ու եղբայր էլ ունի։ Նա խոստանում է շատ շուտով Հայաստան գալ` ծնողներին տեսնելու:
Այն, որ կատարած քայլի համար Խորենը ծնողներին չի մեղադրում, այլ փորձում է արդարացնել, խոսում է ծնողական գուրգուրանք չտեսած տղայի մեծ սրտի մասին: «Ես հասկանում եմ` ուրեմն ստիպված են բերել մանկատուն, դժվարին տարիներ էին»,-ասում է Խորենը։
Մեկ տարի առաջ Խորենը Լեհաստան էր գնացել, բայց ոչ ուսման համար: 2016թ-ի ամռանը տղան հիվանդացել է թոքաբորբով, որոշ ժամանակ բուժվել Գյումրիում, ապա՝ Երևանում, իսկ 3 ամիս անց՝ հեռացել երկրից: Հրավիրող կողմը՝ «Մայա Բրանթ» բարեգործական հիմնադրամը, Խորենին Լեհաստանում ապահովել է բնակարանով, հոգում է ծախսերը, վճարում ուսման վարձը: Թեև Կրակովում Խորենը լրագրություն է սովորում, նրա տարերքը երգն է, ու հենց համացանցում գցած իր երգերի շնորհիվ շատերը ճանաչեցին Խորենին:
