ԵՐԵՎԱՆ, 12 օգոստոսի — Sputnik, Նորայր Շողիկյան. Վերջին տասնհինգ տարիների ամենաշոգ ամառը, կարծես, նահանջում է: Համենայն դեպս, այդ են հուշում հիդրոմետ ծառայության կանխատեսումները:
Շոգից բողոքողներին թվում էր, թե այսպիսի շոգ ամառ երբևէ չէր եղել: Իրականում 6 տարի առաջ՝ 2011թ.-ին, օդի ջերմաստիճանը հասել էր +44 աստիճանի: Պարզապես այն ժամանակ շոգը երկար չէր պահպանվել: Նման բարձր ջերմաստիճան գրանցվել էր 1-2 օր: Իսկ այս տարի գրանցված բարձր ջերմաստիճանը ռեկորդային ձևով պահպանվեց ամբողջ 5 օր: Օգոստոսի 5-9-ը Արարատյան դաշտում և Երևանում ջերմաստիճանը հասավ 40-41 աստիճանի, իսկ օգոստոսի 7-ին Երևանի Էրեբունի համայնքի տարածքում հասավ մինչև +41.8-ի, հուլիսի 29-ին էլ Արարատի մարզում գրանցվեց ռեկորդային +42.6 աստիճան:
«Շոգը ոչ թե գնահատվում է բացարձակ ցուցանիշով, այլ իր տևողությամբ, այսինքն կարող է բարձր ջերմաստիճան լինել, բայց մեկ-երկու օր, հետո տեղի ունենա ջերմաստիճանի անկում ու ողջ ամառվա ընթացքում նման բարձր ջերմաստիճաններ չլինեն»,- Sputnik Արմենիային ասաց ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանը:
Հայաստանցիների համար վերջին 15 տարիների ընթացքում շոգ ամառներն արդեն անակնկալ չեն: Շոգ ամառներով աչքի ընկած 2006, 2010, 2011 և 2015 թվականների շարքում կարելի է առանձնացնել 2006թ-ը՝ 38 աստիճան ջերմությամբ, և 2011-ը, երբ օդի ջերմաստիճանը հասել էր +44 աստիճանի, համեմատաբար հով է եղել 2009-ի ամառը:
«Վերջին 15 տարիների ընթացքում գրանցվող շոգ եղանակը կապված է Հայաստան ներթափանցող ջերմային ալիքների թվի կտրուկ ավելացման հետ, որն էլ կապված է շոգերը ձևավորող ցիկլոնի ակտիվացման ցիկլի հետ»,- նշեց Գագիկ Սուրենյանը:
«Հիդրոմետ»-ի կանխատեսումների համաձայն, մի քանի օրից՝ օգոստոսի 15-ից, ջերմային ալիքներն իրենց տեղը կզիջեն սևծովյան ցիկլոնին: Բարձր ջերմաստիճանը կնվազի միանգամից 5-6 աստիճանով, իսկ երեկոյան ժամերին կլինեն տեղումներ:
Ձմռան ցուրտ ամսիները վերապրելուց հետո հայ բնակչությանը հաջողվեց հաղթահարել նաև ռեկորդային շոգ ամառը: 3 օր հետո, թերևս, սոցցանցերում այլևս չենք հանդիպի շոգից բողոքող հայ օգտատերերի ստատուսների:
