ԵՐԵՎԱՆ, 11 օգոստոսի — Sputnik. Վերջապես հայաստանցիներին տանջող շոգը կնահանջի։ Այդ մասին Sputnik Արմենիայի հետ զրույցում ասաց «Հիդրոմետ» ծառայության օդերևութաբանության կենտրոնի պետ Գագիկ Սուրենյանը։
«Այսօր Սև ծովի շրջաններից հանրապետության տարածք նկատվում է սառը օդի ներհոսք, ինչի պատճառով օդի ջերմաստիճանը հանրապետության ամենաշոգ վայրերում ցերեկը չի բարձրանա +36 աստիճանից, առանձին շրջաններում կեսօրից հետո սպասվում են ամպրոպային բնույթի կարճատև անձրևներ»,–ասաց Սուրենյանը:
Սուրենյանի խոսքով` օգոստոսի 12-14-ը այդ սառը հոսանքները կնահանջեն և օդի ջերմաստիճանը կրկին կբարձրանա 3-4 աստիճանով, Արարատյան դաշտում, Սյունիքի հովիտներում և Երևանում հասնելով +38…+39 աստիճանի, այդ օրերին Հայաստանի ողջ տարածքում տեղումներ չեն լինի:
Օգոստոսի 15-ի երեկոյան ժամերից սկսած Հայաստանը կգտնվի սևծովյան ցիկլոնի ազդեցության գոտում: Օգոստոսի 15-ին երեկոյան, հատկապես հյուսիսային շրջաններում, 16-ին կրկին երեկոյան բոլոր շրջաններում սպասվում է անձրև և ամպրոպ:
Օգոստոսի 15-16-ին օդի ջերմաստիճանը կնվազի 5-6 աստիճանով և արդեն ամենաշոգ վայրերում, մասնավորապես Արարատյան դաշտում և Երևանում ցերեկը հասնելով +32…+33 աստիճանի, որը կլինի կլիմայական նորմայի սահմաններում:
Անդրադառնալով տարածված կարծիքին, թե շոգ ամռան պատճառով ձմեռն էլ աննախադեպ ցուրտ կլինի` օդերևութաբանության կենտրոնի պետն ասաց, որ նման օրինաչափություն գոյություն չունի։
«Այս տարվա շոգն աննախադեպ էր, որովհետև օրվա մեջ +40…+41 աստիճանը պահպանվում է 3–4 ժամ, ինչը վատ էր անդրադառնում մարդկանց ինքնազգացողության վրա։ 2015թ.–ին ևս գրանցվել էր այս կարգի բարձր ջերմաստիճան, բայց այդ ժամանակ +40…+41 աստիճան օրվա մեջ դիտարկվում էր 1–2 ժամ»,–ասաց Սուրենյանը։
Հիշեցնենք, որ օգոստոսի 5-9-ը Հայաստանում դիտվել է խիստ բարձր ջերմային ֆոն, 5 օր շարունակ Արարատյան դաշտում և Երևանում օդի ջերմաստիճանը ցերեկը տատանվել է +40…+41 սահմաններում, օգոստոսի 7-ին Երևանի ցածրադիր գոտում հասնելով +41.8 աստիճանի: Այդ օրերին օդի օրական միջին ջերմաստիճանը կլիմայական նորմայից բարձր է եղել 5-7 աստիճանով:
