ԵՐԵՎԱՆ, 11 օգոստոսի – Sputnik. Իտալական BPM բանկը կալանք է դրել Instagram–ում հայտնի դարձած 50–ամյա «պարող միլիոնատեր» Ջանլուկա Վակիի կարողության վրա, հայտնում է ՌԻԱ Նովոստին։
Վակին զրկվել է որոշ զբոսանավերից, առանձնատներից, գոլֆի ակումբում բաժնետիրական մասից, որոնք 10–միլիոնանոց վարկի ֆինանսական ապահովությունն էին, որը նա վերցրել է 2008 թվականին։ Այն ժամանակից ընդամենը երկու վճարում է կատարել (յուրաքանչյուր անգամ՝ երկու միլիոն եվրո), սակայն չի կարողացել փակել երրորդը, որի ժամկետը լրանում էր 2015 թվականի վերջին։
Ինչպես նշում է Il Fatto Quotidiano թերթը, միլիոնների ակտիվների կալանքը կարող է դոմինոյի ազդեցություն առաջացնել. ներդրումային հոլդինգի պարտքերի ընդհանուր ծավալը կազմում է գրեթե 30 միլիոն եվրո։
Հունիսի վերջին Ջանլուկա Վակին բաժանվել էր մոդել Ջորջիա Գաբրիելեից, որի հետ հանդիպում էր ավելի քան երեք տարի։ Իր փառքով նա մասամբ պարտական է նախկին ընկերուհուն. անցյալ տարվա հուլիսին տարածած տեսահոլովակում նրանք պարում էին զբոսանավի վրա, դա ցնցել էր ամբողջ համացանցը։
Սոցիալական ցանցերի իտալական օգտատերերը գործարարի խնդրին հեգնանքով վերաբերեցին։
Նրանք առաջարկում են Վակիին գումար վաստակել` տները հավաքելով, նրա լուսանկարները տեղադրում են ինքնաշեն խրճիթների ֆոնին ու մեկնաբանում. «Վակիի առաջին պարն իր նոր կացարանում», նաև հրավիրում են սոցկայքերի աստղին իր ինքնակենսագրականով միլանական Դուոմո հրապարակ, որպեսզի օգնեն նրան եկամտի նոր աղբյուր գտնել։
