ԵՐԵՎԱՆ, 11 օգոստոսի — Sputnik. Ս.թ. դեկտեմբերի 17-ին Մոսկվայում նախանշված է Եվրասիական տնտեսական միության անդամ պետությունների տրանսպորտի նախարարների հանդիպում, որի ընթացքում քննարկվելու է Եվրասիական տնտեսական միության և Մետաքսի ճանապարհի տնտեսական գոտու տրանսպորտի և ենթակառուցվածքների բնագավառի գերակա նախագծերի ցանկը:
Այդ ցանկում հայկական կողմն առաջարկել է ներառել նաև Հյուսիս-հարավ ճանապարհային միջանցքի ներդրումային ծրագրի առ այսօր չիրականացված մասը և «Հարավային երկաթուղու» կառուցման հարցը: Ղրղըզստանի Հանրապետությունում օգոստոսի 4- 5-ին անցկացված խորհրդակցության ժամանակ այս առաջարկությամբ հանդես է եկել ՀՀ տրանսպորտի, կապի և տեղեկատվական տեխնոլոգիաների նախարարի առաջին տեղակալ Գագիկ Գրիգորյանը։
Հիշեցնենք, վերոհիշյալ երկու նախագծերի մեկնարկը տրվել էր 2013թ–ի հունվարի 18-ին։
Ըստ ՀՀ տրանսպորտի և կապի նախարարության և Արաբական Միացյալ Էմիրություններում գրանցված «Ռասիա ՖԶԷ» ընկերության միջև ստորագրված պայմանագրի` նախագծերի արժեքը գնահատվել էր 3 միլիարդ ԱՄՆ դոլար։
Ծրագրի մեկնարկի պաշտոնական արարողությանը հայտարարվեց, որ Չինաստանն այն դիտարկում է որպես «Մետաքսի ճանապարհի» մի մաս, և Հայաստանում երկաթուղու շինարարության նպատակով «Ռասիա ՖԶԷ»-ն համագործակցելու է միջազգային ասպարեզում երկաթուղիների, արագընթաց ճանապարհների, թունելների, կամուրջների կառուցմամբ մասնագիտացած «Չինաստանի հաղորդակցային շինարարական ընկերության» հետ:
Այս խոստումնալից արարողությունից 4 տարի անց, թվում էր ՀՀ կառավարությունն արդեն հրաժարվել է Իրանի հետ երկաթուղային կապ ունենալու մտքից։ Բայց, դատելով պաշտոնական հայտարարություններից, Տրանսպորտի նախարարությունը դեռ հույս ունի իրագործել վաղուց մոռացված նախագիծը։
