ԵՐԵՎԱՆ, 17 մայիսի — Sputnik. Մետաքսի ճանապարհի մասին առաջին անգամ հիշատակել է գերմանացի աշխարհագետ Ֆերդինանդ Ֆոն Ռիխտհոենը՝ 1877 թվականին նշելով, որ կենտրոնական Չինաստանից սկսվելով, այն ձգվել է մինչև Իրանի հյուսիսային շրջաններ, անցել Արաքսի հովտով, Նախիջևանով, մինչև Սև ծովի նավահանգիստներ և այլն. ավելի քան 7000 կմ։
Տնտեսագետ Վիլեն Խաչատրյանը Մետաքսի ճանապարհին Հայաստանի միանալը մի քանի տեսանկյունից է կարևորում ՝ տնտեսական, ներդրումային, զբոսաշրջության։
«Այդ հզոր տնտեսական ուղուն միանալու համար մենք պետք է ունենանք շատ լավ ճանապարհներ՝ լայն, ամուր, արագընթաց, միջազգային չափանիշներին համապատասխանող։ Նաև անհրաժեշտ է դեպի նավահանգիստներ երկաթգիծ ունենալ, արագացնել Իրան-Հայաստան երկաթգծի կառուցումը. մեզ հարկավոր են ճանապարհային հանգույցներ»,- ասաց Վիլեն Խաչատրյանը։
Նա ուշադրություն հրավիրեց Հայաստանում չինական ներդրումների վրա՝ ընդգծելով, որ վերջին 28 տարում Չինաստանը Հայաստանում կատարել է ընդամենը մոտ մեկ միլիոն դրամի ներդրում, այնինչ անհրաժեշտ է պայմաններ ստեղծել դրանց ավելացման ուղղությամբ։
Միաժամանակ, տնտեսագետն ասաց, որ այժմ այդ երկրի հետ ծրագրեր են իրականացվում, որոնց միջոցով մեզ մոտ անվճար չիներեն է դասավանդվում, իսկ Չինաստանից հրավիրում են մեր ուսանողներին՝ միջազգային առևտրային և ներդումային իրավունքի մասնագետներ պատրաստելու նպատակով։
«Հայաստանը պետք է հստակ ռազմավարություն մշակի Մետաքսի ճանապարհին միանալու համար։ Տնտեսական առումով տարանցիկ երկիր լինելը հզոր հեռանկարներ է ներառում։ Կարելի է օգտագործել նաև այն հանգամանքը, որ մենք ժամանակին այդ ճանապարհն մաս կազմած երկիր ենք ու զբոսաշրջության տեսանկյունից դիտարկել հարցը՝ այդ վայրերը վերածելով տուրիստներին գրավող պատմական տարածքների»,- նշեց տնտեսագետը։
Վիլեն Խաչատրյանի դիտարկմամբ՝ Մետաքսի ճանապարհը միայն ցամաքային չէ, Չինաստանը շրջանառում է նաև ծովային տարբերակը, որն ավելի քիչ ծախսատար է, ուստի Հայաստանը պետք է ձգտի միանալ այդ նախագծին՝ ավտոճանապարհներով ու երկաթգծով հասնելով, օրինակ, վրացական և իրանական նավահանգիստներ։
