Լաուրա Սարգսյան, Sputnik
Մինչ Սինգապուրի բնակիչներ անօդաչու տաքսիներ են յուրացնում, Հայաստանի տաքսիստներն իրենց իրավունքները միայնակ են պաշտպանում։ Ամեն մեկը չէ, որ հավատում է Ավտովարորդների պաշտպանության լիգայի նախագահ Տիգրան Հովհաննիսյանի հայտարարությանն այն մասին, որ նա մտադիր է դատի տալ տրանսպորտի նախարար Վահան Մարտիրոսյանին։ Ու, ընդհանրապես, նրան կասկածանքով են վերբերվում։
«Հովհաննիսյանը մաֆիոզ է, նա դիլերություն է անում։ Հանգստյան օրերին Վրաստանից բերած մեքենաներ է վաճառում»,– Sputnik Արմենիայի թղթակցի հետ զրույցում ասաց մասնավոր տաքու վարորդներից Գագիկը (անունը փոխած է)։
Գագիկը պնդում է, որ անհիմն չի անվանել այդպես Հովհաննիսյանին, որի հետ համաձայն է միայն մի հարցում, եթե սովորական տաքսիստները պետք է ամսական 12 հազար վճարեն, ապա օնլայն–ծառայությունների վարորդներն էլ պետք է վճարեն, և եթե ընկերները դատարան դիմեն` Գագիկը կաջակցի նրանց։
Տաքսիստը համոզված է` արդարությունը կարևոր է ամեն հարցում, հեշտ չէ ամբողջ օրը շոգին քաղաքում շրջել, հաճախորդների բողոքները լսել, հանդուրժել նրանց գոռոզ վերաբերմունքն ու դրա հետ մեկտեղ աշխատել անհավասար պայմաններում։
Տաքսիստները, ինչպես նաև «Հիդրոմետ» ծառայության օդերևութաբանության կենտրոնի պետ Գագիկ Սուրենյանը, մեծ պահանջարկ ուենն տարին երկու անգամ` ձմռանն ու ամռանը։ Ձմռանը` վատ եղանակի ու ձնակույտերի պատճառով, ամռանը` անտանելի շոգի։
Սեզոնին միջին վիճակագրական տաքսիստի ստացած գումարը մոտ տասը ժամ աշխատանքի համար կազմում է 11 հազար դրամ։ Այդ գումարից հարկավոր է հանել վառելիքի օրական ծախսը` մոտ 3000 դրամ ու լիցենզիան` 500 դրամ։
Գարնանն ու աշնանը տաքսիստները վաստակում են նշված գումարի գրեթե կեսը։
«Լիցենզիան մենք մեկ տարով ենք ձևակերպում ու ստիպված ենք, նույնիսկ եթե չենք աշխատում, վճարել գումարը մինչ պայմանագրի ժամկետի ավարտը»,– Sputnik Արմենիայի թղթակցի հետ զրույցում ասաց մասնավոր տաքսու վարորդ Արմանը (անունը փոփոխված է)։
Մասնավորների համար իրավիճակն ավելի սրվեց այն բանից հետո, երբ շուկայում հայտնվեցին օնլայն տաքսի–ծառայությունները, որոնք ավելի ցածր սակագներով են աշխատում։ Շատերը չդիմացան մրցակցությանն ու հեռացան դաշտից։
Սակայն ամենամեծ խնդիրը, ինչպես ասում է Արմանը, հաճախորդների անտաշությունն ու անհարգալից վերաբերմունքն է։ Նա չի հավատում նաև, որ որևէ մեկը կհամարձակվի դուրս գալ տրանսպորտի նախարարի դեմ։ Եթե նա ուժ ու գումար ունենար, դատի կտար յուրաքանչյուր անդաստիարակ հաճախորդի։
Օրերս տեղեկություն է հայտնվել, որ Հայաստանի տաքսիստները պատրաստվում են դատի տալ Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանին։
2015 թվականից նոր օրենք է գործում, որի համաձայն տաքսիստները պարտավոր են լիցենզիա ստանալ ու ամեն ամիս 12 հազար դրամ վճարում կատարել, սակայն այդ օրենքը չի տարածվում օնլայն–տաքսի ծառայությունների վրա։ Հայաստանի տրանսպորտի նախարարությունում այդ հարցով զբաղվում են, սակայն չեն շտապում մեկնաբանել։ Պարզաբանում են` նախարարն արձակուրդ է գնացել։
