ԵՐԵՎԱՆ, 8 օգոստոսի — Sputnik. Հայաստանի տաքսիստները պատրաստվում են դատի տալ ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանին։
Աղմուկը բարձրացավ, երբ մասնավոր տաքսիստներին շուկայից սկսեցին դուրս մղել խոշոր կազմակերպությունները, որոնք օնլայն–տաքսի ծառայություն են մատուցում։
«2015 թ. տաքսիների լիցենզավորման նոր կարգ է գործում, որ յուրաքանչյուր վարորդ ամսական պետք է վճարի 12 հազար դրամ, բայց զուգահեռ աշխատում են օնլայն տաքսիներ, որոնք ընդհանրապես լիցենզավորման գումար չեն վճարում: Պարզից էլ պարզ է, որ նրանք ապօրինի դաշտում են: Եթե նրանք չեն վճարում, մենք էլ չենք վճարի, արդեն քանի ամիս է այս վիճակն է», – ասել է Հովհաննիսյանը Հայաստանի օնլայն լրատվամիջոցներից մեկին։
Հայաստանի տրանսպորտի նախարարությունում զբաղվում են այդ հարցով, սակայն դեռ չեն շտապում մեկնաբանել։ Sputnik Արմենիայի թղթակցին տեսչության մամուլի ծառայությունում հայտնեցին, որ այդ հարցին կկարողանան պատասխանել միայն այն ժամանակ, երբ նախարարն արձակուրդից վերադառնա։
Մասնավոր տաքսիների վարորներն արդեն մի քանի տարի է բողոքում են, դեռ տրանսպորտի նախկին նախարար Գագիկ Բեգլարյանի ժամանակներից։ Առաջին բողոքն ուղղված էր 2015 թվականի փետրվարի 1–ին ուժի մեջ մտած տաքսիստների պարտադիր լիցենզավորման մասին օրենքի դեմ։
Տաքսիների վարորդներն այն ժամանակ նշում էին, որ լիցենզիա ստանալը, հաշվի առնելով բոլոր անհրաժեշտ գործընթացները (գազի սարքավորման տեղադրման մասին ակտ, տաքսու նշան, վարորդի հեռախոսահամարով գովազդ, հաշվիչ և այլն.), կարժենա 50 հազար դրամ։
Իսկ 12 հազար ամենամսյա վճարումը բյուջե ներկայիս պայմաններում ուժերից վեր բեռ է։ Ավելացել են կարմիր գծերը, պարտադիր ապահովագրությունը, խախտումները գրանցող տեսախցիկները, թանկացել են պահեստամասերը և այլն։
Իրավիճակն ավելի խորացավ, երբ հայկական շուկա եկան օնլայն–տաքսիները, որոնք նույն ծառայություններն են մատուցում, բայց ավելի էժան սակագներով։
