ԵՐԵՎԱՆ, 9 օգոստոսի — Sputnik. Թուրքական Աղրի շրջանում, Իրանի հետ սահմանի երկայնքով, ծանր տեխնիկայի կիրառմամբ շինարարական աշխատանքներ են իրականացվում։
Համացանցում հայտնված լուսանկարում երևում է` ինչպես են ինքնաշարժ կռունկների միջոցով երկաթբետոնե շինություններ տեղադրում։ Լրատվական աղբյուրները հայտնում են, որ պատի երկարությունը կկազմի 144 կմ՝ Թուրքիայի սահմանի (500 կմ) երկարության 1/3–ից քիչ պակաս։
Այդպես են Թուրքիայի իշխանությունները պատրաստվում պայքարել երկրում արգելված «Քրդստանի աշխատավորների կուսակցության» ահաբեկչական կազմակերպության կողմնակիցների դեմ, որոնք ապօրինի հատում են պետական սահմանը։
Պատը «լրտեսների» համար խոչընդոտ չէ
Հայաստանի հետ սահմանին թուրքական իշխանությունները դեռ նման միջոցներ չեն ձեռնարկում, թեև մամուլում արդեն եղել են հայտարարություններ այն մասին, որ «անվտանգության պատը» կարող է հայտնվել Թուրքիայի «ոչ բարեկամ հարևանների» հետ բոլոր սահմաններին։
ԱՊՀ պատվավոր սահմանապահ, Հայաստանի սահմանապահ զորքերի առաջին հրամանատար (1993 – 2003 թ.թ.), գեներալ–մայոր Լևոն Ստեփանյանի խոսքով` ներկա պայմաններում Թուրքիայի նախաձեռնությունն արդյունավետ չէ։
«Սահմանի պահմանման համար հիմա կիրառվում են բարձր տեխնոլոգիական մշակումներ. անօդաչու թռչող սարքեր, դիտարկման համակարգեր։ Պատրաստված հատուկ նշանակության գործակալին պատը չի կանգնեցնի։ Այդպիսի միջոցները լավ են միայն ապօրինի միգրանտների համար»,– ասում է Ստեփանյանը։
Փորձագետն ընդգծեց, որ «անվտանգության պատն», առաջին հերթին, անհարմարություն կպատճառի ֆաունայի բնակիչներին։ Երկաթբետոնե կառույցները կարող են փակել վայրի կենդանիների ավանդական միգրացիայի ճանապարհները։ Գեներալ-մայոր Ստեփանյանը կարծում է, որ սահմանին իրականացվող շինարարական աշխատանքները պետք է անհանգստացնեն կենդանիների պաշտպանությամբ զբաղվող միջազգային կազմակերպություններին, որոնք պետք է բողոքարկեն թուրքական իշխանությունների «պատսպարման» քաղաքականությունը։
