ԵՐԵՎԱՆ, 8 օգոստոսի — Sputnik. Մի քանի օրից` օգոստոսի 15-ին, «Նաիրիտ» –ի գույքն արդեն երրորդ անգամ կհանվի աճուրդի։ Այս մասին հայտարարությունն արդեն հրապարակված է հրապարակային ծանուցումների azdarar.am պաշտոնական կայքում։ Դրա համաձայն` վաճառքի են հավել ոչ միայն գործարանի սարքավորումներն ու գույքը, այլև մի քանի շենք–շինություն` ընդհանուր առմամբ` 81.5 մլ դրամ արժեքով:
Բայց մինչ գործարանի սնանկության գործով կառավարիչն աճուրդներ է կազմակերպում, պոտենցիալ ներդրողները վստահեցնում են, որ բանակցում են կառավարության հետ` «Նաիրիտը» շահագործելու շուրջ։
«Եվրոպա–Ասիա բիզնես կենտրոն» հոլդինգն արդեն 2–րդ տարին է, ինչ այս հացով դիմել է ՀՀ կառավարությանն ու պատասխանի է սպասում։
Հոլդինգի ներկայացուցիչ, գործարանի նախկին տնօրեն Արմեն Իսրայելյանն այսօր լրագրողների հետ հանդիպմանը հայտարարեց, որ հոլդինգի հետ համագործակցող ներդրողներն այս օրերին Հայաստանում են և բանակցություններ են վարում գործադրի, ավելի կոնկրետ` փոխվարչապետ Վաչե Գաբրիելյանի հետ։
«Հոլդինգը մեկ տարի առաջ արդեն հայտնել էր, որ պատրաստ է ներդրում կատարել «Նաիրիտում», բայց, հաշվի առնելով, որ մեկ տարի է անցել, և «Նաիրիտի» ներկա տեխնիկական վիճակն այն չէ, ինչ մեկ տարի առաջ, հոլդինգը ցանկություն է հայտնում իր միջոցներով տեխնիկական աուդիտ անցկացնել, պարզել, թե արդյոք գործարանի ներկա վիճակը թույլ կտա կատարել նախկին խոստացած չափով ներդրումները»,– ներկայացնելով կառավարության հետ բանակցությունների հիմնական թեման` ասաց Արմեն Իսրայելյանը։
Նշենք, որ մեկ տարի առաջ հոլդինգը կառավարությանն առաջարկել էր 70-100 մլ դոլար ներդրմամբ վերագործակել «Նաիրիտը»։
Գործարանի ներկայիս տեխնիկական վիճակի ուսումնասիրությունն իրականացնելու նպատակով Հայաստանում է Բուլղարիայի ներկայացուցիչ Պլամել Ռուսևը։ Նա հայտնեց, որ նախօրեին եղել է «Նաիրիտում» ու որոշ պատկերացում կազմել գործարանի վիճակի մասին։
«Երեկ մենք մեր գործընկերների հետ եղանք «Նաիրիտի» տարածքում։ Գործարանը վատ վիճակում չէր։ Պարզ է, այն 2010թ–ից ի վեր չի աշխատել, գրեթե 7 տարի, իհարկե, որոշ խնդիրներ կան։ Բայց, ընդհանուր առմամբ լավ է պահպանվել»,– ասաց Ռուսևը։
Ի դեպ, ներդրողները չեն թաքցնում, որ գործարանի վերագործարկման դիմաց կառավարությունից պահանջում են հարկային արտոնություններ և պատասխանատվություն չեն կրելու գործարանի նախկին պարտքերի, այդ թվում աշխատավարձերի համար։
«Նաիրիտը» սնանկ ճանաչվեց 2015թ–ին։ Սնանկության վարույթի համար հիմք էր ծառայել «Նաիրիտ գործարան» ՓԲԸ-ի` ՀԷՑ–ին ունեցած 1 235 003 232 դրամ պարտքը։
Նշենք, որ ներդրողների հետ բանակցությունների մասին մենք փորձեցինք տեղեկատվություն ստանալ Միջազգային տնտեսական ինտեգրման և բարեփոխումների նախարարությունից։ Նախարար Վաչե Գաբրիելյանի օգնական Լուսինե Մնացականյանը խոստացավ մեր հարցմանը պատասխանել նախարարի հետ հստակեցնելուց հետո, բայց այդպես էլ չպատասխանեց։
