ԵՐԵՎԱՆ, 23 հունվարի-Sputnik. «Նաիրիտի համակարգող խմբի» անդամներից մեկը Արագեղեցիկ Կարեյանը հիշեց «Նաիրիտի» վերջին տարիները, երբ աշխատում էին վնասով։ Կարեյանի խոսքով` կառավարությունն իրենց ստիպեց գործարանը վաճառել մեկին, որը գործադիրից լիազորագիր էր ստացել այն գնել շուկայական գնից 25-30 տոկոս ավելի գումարով։
«Պայքարը շարունակվեց մինչև 2006 թվականը։ Կառավարությունը տեսավ, որ ի վիճակի չէ գործարանը հասցնել սնանկության, 2006 թվականին պայմանագիր կապեց «Ռայնովիլ Փրոփերթի Լիմիթեդ» ընկերության հետ, որը կենսագրություն չուներ։ Պայմանագիր կապելուց հետո վերցրեց առաջին փոխանցումը` 700 միլիոն դրամ, որից հանրապետություն մուտք եղավ ընդամենը 40 միլիոնը»,-ասաց նա։
«Նաիրիտ» գործարանի նախկին տնօրեն Կարեն Իսրայելյանն էլ իր խոսքը սկսեց 2 վարչապետներին` Հովիկ Աբրահամյանին ու Կարեն Կարապետյանին մեջբերելով։
«Հովիկ Աբրահամյանը նիստերից մեկի ժամանակ հայտնեց, որ սա կառավարության պարտքը չէ։ Անցնում է կարճ ժամանակ, Հովիկ Աբրահամյանը դրժում է խոստումն ու փակում ուրիշի պարտքերը։ Կարեն Կարապետյանն էլ պատճառաբանեց, թե 10-15 տարիների վերաբերյալ էներգակիրների կանխատեսում չկա»,- ասաց Իսրայելյանը։
Նա կարծում է, որ եթե կառավարությունը շարունակի «Նաիրիտը» վերագործարկելու հարցը ձգձգելու պրոցեսը, ապա անդառնալի խնդիրներ կառաջանան։
«Սնանկության գործընթացը կտանեն մինչև վերջ՝ գրանցված պահանջատերերի հետ պարտքերը մարելու համար, իսկ դա մոտավորապես 80-100 միլիոն դոլար է։ «Նաիրիտ» գործարանը կկիսեն երկու մասի, մի մասը պարտքի դիմաց կտան սնանկության կառավարչին, որ նա փակի պարտքերը, իսկ այդ մի մասի մեջ մտնում է կաուչուկի արտադրությունն ամբողջությամբ։ Մյուս մասն էլ առողջացման ծրագրի տակ տալիս են «Նաիրիտ» գործարանին. դրա ներքո էլ տեսում են քլորի արտադրանքը»,- ասաց Իսրայելյանը։
Հիշեցնենք, որ «Նաիրիտի համակարգող խմբի» անդամները հարցի լուծման համար 2016 թվականի հունիսի 18-ին առաջին կոչն ուղղեցին բոլոր կուսակցություններին, որոնք ԱԺ-ում ունեն պատգամավորներ։
Բոլորը երթով շարժվեցին դեպի նախագահական նստավայր։ Նպատակը երկրի տնտեսության զարգացումն էր` «Նաիրիտի» միջոցով։ Եղավ ներդրողի` «Եվրամիություն-Ասիա բիզնես ֆինանսական կենտրոն» հոլդինգի նամակը վարչապետին, բայց այն մնաց անարձագանք։
Նաիրիտցիները հույսները չեն կորցնում։ Պայքարելու են մինչև վերջ, որ ժամանակի տնտեսական հսկան վերադառնա նախկին փառքին։
Այսօր նաիրիտցիներին ձեռք մեկնեցին ընդդիմադիր կուսակցությունները։
