Երևան, 7 օգոստոսի – Sputnik. Հայաստանի քաղաքացիների ամենանախընտրելի ծովափնյա հանգստավայրերը Եվրոպայում են: Առավել տարածված են Հունաստանը և Իսպանիան:
«Էական դեր է խաղացել Երևանից դեպի եվրոպական քաղաքներ չարթերային չվերթերի բացումը», — լրագրողների հետ հանդիպմանը ասաց Armenia Travel Plus տուրիստական ընկերության տնօրեն Հայկ Գրիգորյանը:
Եվրոպական երկրները գրավիչ են, սակայն Բաթումը, Քոբուլեթին, Ուռեկին ավելի մատչելի են, քան եվրոպական և հայկական հանգստավայրերը: Դեպի ծով ելք չունեցող մեր երկրում հանգստանալն ավելի թանկ է, քան հարևան Վրաստանում: Հոսթելների մշակույթը մեր մոտ դեռ նոր է զարգանում, իսկ հյուրանոցների գները հաճախ ավելի բարձր են, քան Եվրոպայում:
7 օրվա տուրի համար Հայաստանում, որի մեջ մտնում է երեքանգամյա սնունդ և մի քանի քաղաքներ այցը, զբոսաշրջիկը կծախսի 1000 եվրո: ՀՀ քաղաքացիների համար այդ գումարը կարող է 10%–ով կամ 100 եվրոյով ավելի էժան լինել: Մինչդեռ ուղևորությունը Հունաստան կամ Իտալիա ավելի էժան կարժենա:
Իսկ վրացական ափում հանգիստն էլ ավելի էժան կարժենա: Ինչպես ասում էր խորհրդային հայտնի «Կովկասյան գերուհին» ֆիլմի հերոսներից մեկը՝ մեր ցանկությունները պետք է համատեղենք մեր հնարավորությունների հետ:
Հայերի շրջանում վրացական հանգստավայրերի հանրամատչելիության մասին խոսում են նաև ՀՀ տնտեսական զարգացման և ներդրումների նախարարության պետական զբոսաշրջության կոմիտեում: Վրաստանից հետո առավել մատչելի են Եգիպտոսը, Բուլղարիան, Հունաստանը, Շրի Լանկան և Իտալիան:
Համաձայն վիճակագրական տվյալների`2016 թվականին Վրաստան է այցելել Հայաստանից 320 հազար զբոսաշրջիկ: Ընդհանուր առմամբ, անցած տարի Վրաստան է այցելել մեր երկրի քաղաքացիներից 1 մլն 400 հազար մարդ:
