ԵՐԵՎԱՆ, 7 օգոստոսի — Sputnik. Այժմյան Թուրքիայի տարածքում գտնվող Դիարբեքիր քաղաքի (պատմական Տիգրանակերտի մի մասը) Սուր շրջանում քաղաքաշինական նոր նախագծի շրջանակում ամբողջովին քանդվել է 600 շինություն, Սուրի երկու խոշոր թաղամասերի 80 տոկոսն ամբողջովին գետնին է հավասարեցվել, տեղեկացնում է tert.am-ը՝ հղում անելով demokrathaber.org-ին։
Սուրում, հակառակ թաղամասերից դուրս գալու քաղաքապետարանի պարբերական կոչերի, դեռևս շարունակում են մնալ մի քանի հազար բնակիչներ, որոնք համառորեն մերժում են տներից դուրս գալու պահանջը: Նրանք զրկված են ջրի, գազի և էլեկտրաէներգիայի մատակարարումից:
Ակտիվիստները Սուրի ողբերգությունը կանգնեցնելու կոչով պատրաստվում են դիմել UNESCO-ին և ՄԱԿ-ին:
2016թ.-ին պետականացված գույքի ցուցակում էր հայտնվել նաև հայկական Սուրբ Կիրակոս եկեղեցին, որը, սակայն, ավելի ուշ հաջողվեց վերադարձնել մշակութային հիմնադրամին, որին եկեղեցին պատկանում էր մինչ բռնի պետականացումը:
Թուրք-քրդական բախումների հետևանքով խոշոր ավերածությունների ենթարկված Սուրի շրջանում ռազմական գործողություններից տուժել է ավելի քան 40 հազար խաղաղ քաղաքացի: Սուրում թուրքական հատուկ ուժերի գործողությունները սկսվել էին 2015թ.-ի սեպտեմբերի 6-ին և ավարտվել 2016թ.-ի մարտի 10-ին: Սուրի աղետի պատճառով ավերածության է ենթարկվել շրջանի շուրջ 29 հազար թաղամաս:
