ԵՐԵՎԱՆ, 7 օգոստոսի — Sputnik. Պոլսո հայոց պատրիարքի՝ արդեն նախկին փոխանորդ Արամ արքեպիսկոպոս Աթեշյանը վերջերս նամակների շարքով պատասխանել էր 9 տարվա ընթացքում իր դեմ ուղղված մի շարք մեղադրանքների, գրում է «Ժամանակ» օրաթերթը։ Թուրքիայում գործող «Յըլդըզ» հետազոտական ընկերությունը հետաքրքրվել է,թե ինչ կարծիքի են այդ նամակների մասին ստամբուլահայերը։
Ընդհանուր առմամբ, հարցմանը մասնակցած ստամբուլահայերի 64,29 տոկոսը ճիշտ է համարում տարիներ շարունակ անպատասխան մնացած հարցերին արձագանքելու Աթեշյանի նախաձեռնությունը, անկախ նրանից՝ հավատում են դրան թե ոչ:
Հարցվածների 4,.98 տոկոսը հայտարարությունների մեծ մասն անկեղծ է համարել, 33,93 տոկոսը դրանք ստահոդ է որակել, մնացածը ձեռնպահ են մնացել Աթեշյանի նամակները մեկնաբանելուց:
Պոլսահայերի 82,59 տոկոսի համար համոզիչ չեն Աթեշյանի այն պնդումները, թե իր գործունեության ընթացքում նա պատրիարքարանի համար հատուկ թանգարան է հիմնել:
Հարցման մասնակիցների 65,18 տոկոսը չի հավատում այն մեղադրանքներին, ըստ որի Արամ Աթեշյանը բիզնես ունի Մոսկվայում: Հարցվածների 51,34 տոկոսը նույն կերպ չի հավատում, թե Աթեշյանը վաճառել է պատրիարքարանին պատկանած արժեքավոր գեղանկարները:
44,2 տոկոսը մտահոգիչ է համարում արքեպիսկոպոս Աթեշյանի սերտ կապերը Թուրքիայի պետական մարմինների հետ, իսկ 34,38 տոկոսը դա բնական է համարել:
