ԵՐԵՎԱՆ, 25 մայիսի — Sputnik. Պոլսահայ համայնքն արդեն բանի տեղ չէր դնում Արամ Աթեշյանին, նրա վերջին պատարագին ընդամենը 9 մարդ է մասնակցել. այս մասին Sputnik Արմենիային ասաց Բագրատ Էստուկյանը։
«Հայ առաքելական եկեղեցու պատմության մեջ չկա մի հոգևորական, որ այս աստիճան խայտառակ լինի, ուստի պոլսահայ համայնքը նրան մեկ մարդու պես պատժեց»,- ասաց Էստուկյանը։
Նրա խոսքով` Պոլսո պատրիարքի նախկին փոխանորդ Արամ Աթեշյանը հատկապես վախեցավ մայիսին Մոսկվայում կայացած Գերագույն հոգևոր ժողովից, որտեղ հստակ ասված էր` մենք ճանաչում ենք ընտրված տեղապահին` արքեպիսկոպոս Բեքչյանին, և հորդորում ենք Արամ Աթեշյանին ժամ առաջ հրաժարվել իր պահվածքից, որպեսզի եկեղեցու կանոնադրությամբ սահմանված բարքերը պահպանվեն։
«Դրանից հետո նա 2 բան կարող էր անել` կա՛մ ամենամոտ խանութից պարան գտներ ու կախվեր, կա՛մ հրաժարվեր աթոռից։ Այսինքն` նրան այս քայլին դրդել է վախը»,- վստահեցրեց Էստուկյանը։
Պոլսո 85-րդ պատրիարքի անունը հայտնի կդառնա վեց ամսվա ընթացքում, առաջիկայում կկատարվի ընտրողների ցուցակագրումը, 10-15 օրվա ընթացքում կձևավորվի նախաձեռնող մամինը, որի 15 անդամներից 13-ն աշխարհիկ մարդիկ պետք է լինեն։
Էստուկյանի խոսքով` Գարեգին Բեքչյանը մոտ ապագայում Գերմանիայից կժամանի Պոլիս, կտեղավորվի իր սենյակում և որպես տեղապահ կսկսի իր գործունեությունը։
«Արամ Աթեշյանն ամեն ինչ պաշտոնապես կհանձնի տեղապահին և կհեռանա այդ շենքից, որովհետև այլևս այդտեղ ապրելու իրավունք չունի»,- ասաց նա։
Այնուհետև կսկսի քարոզարշավը, որը կտևի 3-4 ամիս, որպեսզի բոլոր թեկնածուները կարողանամ ներկայացնել իրենց ծրագրեն ու անելիքները։
Ընտրության օրը պատրիարքարանում պոլսո համայնքի մոտ 100 ներկայացուցիչ կկատարեն իրենց ընտրությունը, որն անցկացվում գաղտնի քվեարկությամբ։ Այդքանը հաշվելուց հետո միայն պարզ կդառնա Պոլսո 85-րդ պատրիարքի անունը։
Նշենք, որ Պոլսո Հայոց պատրիարքարանում մարտի 15-ին գումարված հոգևորականների ժողովը պատրիարքական տեղապահ էր ընտրել Գերմանիայի Հայոց թեմի առաջնորդ Գարեգին արքեպիսկոպոս Բեքչյանին: Աթեշյանը, սակայն, ընտրությունների արդյունքների հրապարակումից անմիջապես հետո ներկայացրել էր նահանգապետարանից ստացված գրությունը, որն իրավաբանորեն անհնար է համարում պատրիարքական ընտրությունների գործընթացի մեկնարկը: Նա հրաժարվել էր հեռանալ պատրիարքական փոխանորդի պաշտոնից՝ ասելով, որ թուրքական իշխանություններն իբրև պատրիարքարանի պաշտոնական ներկայացուցիչ միայն իրեն են ճանաչում:
