ԵՐԵՎԱՆ, 5 օգոստոսի — Sputnik. ԱՄՆ վարչակազմը մտադիր է փոփոխություններ մտցնել այն հարցաթերթիկներում, որոնք լրացնում են օտար պետությունների քաղաքացիները՝ ամերիկյան վիզա ստանալու համար փաստաթղթեր ներկայացնելիս, հաղորդում է «Ամերիկայի ձայնի» ռուսական ծառայությունը։
Այս շաբաթվա վերջում Պետդեպարտամենտը պաշտոնապես հայտ է ներկայացրել ԱՄՆ Դաշնային գրանցման ծառայություն՝ խնդրելով հաստատել փաստաթղթի նոր ձևը որպես մշտական։
Առաջին անգամ հարցաթերթիկի նոր տարբերակը ներկայացվել էր այս տարվա մայիսին։ Այն պարունակում է լրացուցիչ հարցեր՝ երբևէ գործածված բոլոր անձնագրերի տվյալների մասին, տեղեկություններ սոցցանցերի հաշիվների մասին վերջին հինգ տարիներին, էլեկտրոնային փոստի հասցեները, բջջային և այլ հեռախոսահամարները, նաև վերջին 15 տարիների մասին ամբողջական կենսագրական տեղեկություններ, այդ թվում՝ աշխատավայրերի ու բոլոր արտասահմանյան ուղևորությունների մասին տվյալներ։
Այդ տեղեկությունների ներկայացումը կամավոր է, բայց հարցերին պատասխանելու դժկամությունը կարող հանգեցնել մերժման՝ վիզա տրամադրելու հարցում։
Հարցաթերթիկի նոր ձևը հաստատել է վարչակազմը՝ ներգաղթի քաղաքականությունը խստացնելու արշավի շրջանակում։ Պետդեպարտամենտում հրաժարվել են հայտնել, թե որ երկրների քաղաքացիները պետք է տրամադրեն այդ տեղեկությունները։ Ընդ որում՝ պարզաբանել են, որ աշխարհում «լուրջ կասկածներ» են առաջացնում ամերիկյան վիզաների ստացման համար տարեկան մոտ 65 000 հայտերը։
Այս շաբաթ ԱՄՆ նախագահը նոր նախաձեռնություն է ներկայացրել, որի իրականացումը առաջիկա տասը տարվա ընթացքում 50 տոկոսով կկրճատի օրինական միգրանտների թիվը։
