ԵՐԵՎԱՆ, 3 օգոստոսի — Sputnik. Դավթաշենի տներից մեկում ականի պայթյունից տուժածի վերջույթը վիրահատել են: Ինչպես Sputnik Արմենիա-ի հետ զրույցում նշել են «Արմենիա» բուժկենտրոնից՝ հաջողվել է փրկել 20 տարեկան Աշոտի ոտքը:
Ավելի վաղ լուրեր էին տարածվում, որ ստացած վնասվածքների պատճառով հնարավոր է՝ տուժածի ոտքը անդամահատեն:
Դավթաշեն 2-րդ թաղամասում որոտացած պայթյունի մասին արտակարգ իրավիճակների նախարարություն հայտնել են օգոստոսի 2-ի երեկոյան:
Դեպքի վայր է ժամանել երկու փրկարարական ջոկատ, ճգնաժամային կառավարման ազգային կենտրոնի օպերատիվ խումբը, հոգեբանական օգնության կենտրոնի հրահանգիչը:
Ինչպես հայտնի դարձավ՝ պայթյունը որոտացել է Ռ. Մ. տան բակում, պայթյունի հետևանքով 1997 թ. ծնված Ա. Ե.-ն և 1989 թ. ծնված Ն. Ե.-ն տարբեր մարմնական վնասվածքներով հոսպիտալացվել են «Արմենիա» բուժկենտրոն, որտեղ Ն. Ե.-ը մահացել է։ Դեպքի վայրում հայտնաբերվել է 2 ական, որոնցից մեկը՝ մասնատված:
