ԵՐԵՎԱՆ, 3 оգոստոսի — Sputnik, Անի Լիպարիտյան. Երևանի Դավթաշեն 2-րդ փողոցի տներից մեկում որոտացած պայթյունից տուժածները տեղափոխվել են « Արմենիա» բժշկական կենտրոն, որտեղ ավելի ուշ նրանցից մեկը մահացել է: Այդ մասին Sputnik Արմենիայի հետ զրույցում պատմել է ճգնաժամային կառավարման ազգային կենտրոնի պետի տեղակալ, փրկարար ծառայության փոխգնդապետ Արսեն Մկրտչյանը:
Նրա խոսքով՝ դեպքի վայր են ժամանել իրավապահ մարմինների աշխատողները, որոնք տան նկուղում հայտնաբերել են ական, որը տեղափոխել են պաշտպանության նախարարությանը կից ականազերծման կենտրոն:
«Պայթյունը տեղի է ունեցել Դավթաշեն 2-րդ թաղամասի թիվ 56/2 տանը. Դեպքի վայր են ժամանել նաև հոգեբանական կենտրոնի աշխատողները»,- ասել է Մկրտչյանը:
Ինչպես հայտնի դարձավ՝ պայթյունը որոտացել է Ռ. Մ. տան բակում, պայթյունի հետևանքով 1997 թ. ծնված Ա. Ե.-ն և 1989 թ. ծնված Ն. Ե.-ն տարբեր մարմնական վնասվածքներով հոսպիտալացվել են «Արմենիա» բուժկենտրոն, որտեղ Ն. Ե.-ն մահացել է։ Դեպքի վայրում հայտնաբերվել է 2 արկ, որոնցից մեկը՝ մասնատված:
Տուժածները հանգիստ մարդիկ էին
Լարիսան՝ պայթյունի պատճառով տուժած Աշոտի հորաքույրն է: Sputnik Արմենիայի թղթակցի հետ զրույցում նա խոստովանեց՝ այդ դեպքը դարձել է ամպրոպ անամպ երկնքում:
«Աշոտն իմ եղբոր որդին է: Մենք ծնվել ու մեծացել ենք այստեղ, մեր ընտանիքը միշտ բարի համբավ է ունեցել…Ինքս ապրում եմ ուրիշ թաղամասում, բայց եկել էի մտերիմներիս տուն։ Պարզվում է՝ մեր հարևան Ռուբենը ականը տվել է մերոնց, իսկ ինքը գնացել: Տուժել են իմ եղբայրը և նրա որդին»,- պատմեց Լարիսան, որը նոր էր վերադարձել «Արմենիա» բուժկենտրոնից։
Պարզվել է, որ Աշոտի հայրը մահացել է երկու տարի առաջ, և պայթյունի պատճառով մահացած 32 տարեկան Նիկոլը դարձել էր նրա համար հայր և ընկեր: Ինչպես պատմեց Լարիսան, Նիկոլն ամեն օր այցելել է մահացած եղբոր շիրմին:
«Ես եղել եմ հիվանդանոցում, բժիշկներն ասացին, որ, ամենայն ավանակությամբ, կանդամահատեն նրա ոտքը: Ես չկարողացա զսպել ինձ և բարկացա»,- ասաց Լարիսան։
Լարիսան պատմեց նաև, որ Աշոտը զորացրվել է հուլիսի 22-ին՝ հորեղբոր ծննդյան օրը:
«Նրանք երկուսն ել համեստ են եղել: Հարցրեք այստեղ Ֆրունզեի երեխաների մասին՝ բոլորը կասեն, թե ինչ համեստ են նրանք եղել» — հավելեց Լարիսան:
Նիկոլն աշխատանքի էր գնում ինքնուրույն սարքած մեքենայով
Ֆրունզեի պապիկը (մահացած Նիկոլի հայրը և Աշոտի պապիկը) Sputnik Արմենիայի հետ զրույցում պատմեց, որ թոռը տարբերվել է իր կարգապահությամբ:
«Մեր տղան բոլորովին վերջերս էր վերադարձել բանակից՝ հուլիսին: Նա կռվել է ապրիլյան պատերազմի ժամանակ, եղել է Ջեբրայիլում: Այնտեղ նրա հետ ոչինչ չպատահեց, իսկ այստեղ…»,- ասաց Ֆրունզեն, որն Արցախի պատերազմի մասնակից է եղել:
Ֆրունզեն պատմել է,որ դեպքի վայր են ժամանել իրավապահ մարմինների աշխատակիցները: Արտակարգ իրավիճակների նախարարության շունը գտել է ևս մեկ ական, որը նույնպես տարել են:
Նա նաև ցույցը տվել մեզ փողոցում տեղակայված դեղին մեքենան, որը պատկանում էր մահացած Նիկոլին:
«Իսկ սա իմ մահացած տղու մեքենան է, որը նա ինքն է սարքել…Նա ամեն օր աշխատում էր գերեզմանոցում՝ քարեր էր բերում…»,- պատմեց պապիկը:
Նրա խոսքով՝ հարևաները մի քանի տարի առաջ հող են առել և տուն են կառուցել: Ֆրունզեի երեխաները և թոռները միշտ օգնել են Ռուբենին:
Ինչպես նշել են տուժածների հարևանները և բարեկամները՝ հասկանելի չէ, թե ինչու էին նրանք սղոցում ականը։ Ամենայն հավանականությամբ, նրանք մտածել են, որ մեջը ոսկի է կամ պայթուցիկ սարք:
