ԵՐԵՎԱՆ, 3 օգոստոսի — Sputnik. Մխիթար Սեբաստացու ու միաբանության ազգանվեր գործունեությունը հանրության լայն շրջանակներին ներկայացնելու նպատակով սեպտեմբերի երկրորդ կեսին «Մեծամոր» պատմահնագիտական արգելոց-թանգարանում գիտաժողով կանցկացվի` նվիրված Մխիթարյան միաբանության՝ Վենետիկի Սուրբ Ղազար կղզի մուտք գործելու 300-ամյակին:
«Մեծամորը պատահական չի ընտրվել: Ղևոնդ Ալիշանն իր «Այրարատ» աշխատությունում հիշատակել է նաև Մեծամոր գետը, հուշարձանը:Այսինքն, այդ առումով որոշակի կապ կա: Մեր նպատակն է գիտաժողովի միջոցով արժևորել միաբանության անգնահատելի դերը հայ ու համաշխարհային մշակույթի, պատմության մեջ: Նախատեսում ենք հրավիրել ինչպես հայ, այնպես էլ` օտարերկրացի գիտնականների, միաբանների Վենետիկից»,- Sputnik Արմենիայի հետ զրույցում ասել է «Մեծամոր» պատմամշակութային արգելոց-թանգարանի վարիչ Արտավազդ Զաքյանը:
Նրա համոզմամբ` այդօրինակ կարևոր միջոցառման անցկացումը կնպաստի նաև Մեծամորը հանրաճանաչ դարձնելուն:
Խոսելով հնավայրի տարածքում արդեն մի քանի տարի իրականացվող պեղումների մասին, Զաքյանը նշեց, որ հայ-լեհական հնագիտական արշավախումբը նախորդ տարի հատուկ սարքերի միջոցով վերևից նկարահանել-սքանավորել է հնավայրի տարածքի որոշակի հատվածը: Դա մեծապես կօգնի աշնանը վերսկսվող պեղումների աշխատանքին:
Ի դեպ, «Մեծամորում» ցուցադրվում են վաղ բրոնզից մինչև ուշ միջնադարին վերաբերող և պեղումների ժամանակ հայտնաբերած նյութեր: Մասնավորապես, մ.թ.ա. III-I հազարամյակների ոսկե, արծաթե, սաթե, կիսաթանկարժեք քարերից, մածուկից պատրաստված եզակի մշակութային արժեքներ: Նրա խոսքով՝ հատուկ է պահվում նաև սարդոնիքսի բնակտորից պատրաստված գորտի արձանիկը:
Արտավազդ Զաքյանի փոխանցմամբ ՝ Մեծամորում հաճախ են կազմակերպվում նաև կրթական, մշակութային միջոցառումներ: Դրանք ևս միտված են արգելոց-թանգարանի հանրահռչակմանը, օտարերկրյա զբոսաշրջիկների համար գրավչություն ապահովելուն:
