ԵՐԵՎԱՆ, 3 օգոստոսի – Sputnik. Երեկ երեկոյան Դավիթաշեն վարչական շրջանի տներից մեկում տեղի ունեցած պայթյունի հետևանքով վիրավորվածի ոտքն, ամենայն հավանականությամբ, կանդամահատվի։ Այս մասին Sputnik Արմենիային հայտնել է Լարիսան` տուժածի հորաքույրը, որը նոր էր վերադարձել հիվանդանոցից։
Պայթյունի հետևանքով մահացածը Լարիսայի եղբայրն է, վիրավորը`զարմիկը`մյուս եղբոր տղան։
«Նա վերջերս էր վերադարձել Արցախից, որտեղ ժամկետային ծառայություն էր անցում Մեխակավանում», – պատմեց մեզ տուժածի պապիկը` Ֆրունզեն, որն արցախյան պատերազմի մասնակից է։ Բանակում ծառայելու ընթացքում նրա թոռը մասնակցել էր 2016 թվականի ապրիլյան քառօրյա պատերազմին։ Նրա խոսքով` մահացածն ու տուժածը համեստ, աշխատող մարդիկ էին, նրանք էլ օգնում էին հարևանին տուն կառուցել, որի նկուղում էլ տեղի է ունեցել դժբախտ պատահարը։
Պայթյունի վայրում երեք ական է հայտնաբերվել։ Դրանցից մեկը հայտնաբերել է ոստիկանությունը, մյուսը` ԱԻՆ աշխատակիցները։ Ականի դետոնատորը գործել է, երբ այն փորձում էին սղոցել։ Պապի խոսքով` տղաները լիարժեք պատկերացում չեն ունեցել, թե դա ինչ գործիք է։
«Նրանց թվացել է, որ մեջը կարող է թանկարժեք մետաղներից մասեր լինել, կամ պայթուցիկ, որով կարելի է ձուկ որսալ», – ասաց նա։
Քաղաքացին, որի տան նկուղում տեղի է ունեցել պայթյունը, տունը գնել է չորս տարի առաջ։ Միջադեպից հետո նա փախել է, տվյալ պահին նրա գտնվելու վայրն անհայտ է։ Հիմա տան վրա կնիք է դրված։
Պայթյունի վայրի հարևանությամբ գտնվող բնակելի տները չեն տուժել։
