Իրավիճակը խիստ վտանգավոր է ու փոփոխական,ասելիք չկա. Վենեսուելայում տեղի ունեցող իրադարձությունների մասին հարցին հենց այդպես է արձագանքում Ռադիո Արմենիայի հիմնադիր և տնօրեն Դինգո Կարամանուկյանը: Նա Ուրուգվայում է, Վենեսուելայի իրադարձություններին հետևում է հեռվից: Այլ մեկնաբանություններից միանգամից է հրաժարվում:
Ըստ նրա՝ երկրի պես երկու մասի է բաժանված նաև Վենեսուելայի հայկական համայնքը: Մի մասն իշխանությունների, մյուսները՝ ընդդիմության կողմնակիցներն են: Ցանկացած խոսք կողմերից յուրաքանչյուրն իր դեմ է ընկալում:
Իրադրությունը երկրում լարվեց մայիսից: Նախագահ Նիկոլաս Մադուրոն որոշում կայացրեց Սահմանադրական ասամբլեայի գումարման մասին, ընդ որում, առանց նախնական հանրաքվեի: Դա սկիզբն էր: Ընդդիմությունը գնաց բողոքի ճանապարհով: Արդեն 110 մարդ է զոհվել ընդդիմություն-իշխանություն առճակատման հետևանքով: Գրեթե 5000 մարդու ձերբակալությունը անցկացման, հանգեցրել է իրադրության սրմանը, որն արդեն մեկ ամիս է՝ լարված է խոշոր հակակառավարական ելույթների պատճառով: Ընդդիմության կազմակերպած բողոքի ակցիաների ընթացքում արդեն զոհվել է ավելի քան 110 մարդ։ Իշխանությունները ձերբակալել են մոտ 4,9 հազար ցուցարարի, որոնցից գրեթե 1,4 հազարը մինչ օրս մնում է կալանքի տակ։
Հուլիսի 30-ին էլ Վենեսուելայում Սահմանադրական ասամբլեայի ընտրություններն անցկացվեցին: Ցույցերն այդ օրն էլ շարունակվեցին: Սպանվեց 11 մարդ, ձերբակալվեց 100 ցուցարար: Զոհերից 3-ը դեռահասներ էին:
Զարգացումների մասին տեղեկություններ ստանալու համար Հայաստանի սփյուռքի նախարարության օգնությամբ փորձեցինք կապ հաստատել նաև տեղի հայտնի հայերի հետ: Արամ Ահարոնյանը Կարակասի հեղինակավոր Տելեսուր հեռուստաընկերության հիմնադիր տնօրենն է: Շատ լրատվամիջոցներ գրում են, որ այդ երկրում խափանված է ինտերնետ հասանելիությունը: Հավանաբար, նաև այդ պատճառով կապն Ահարոնյանի հետ չստացվեց:
Ըստ տեղեկությունների՝ երկրում վախի ու բռնության մթնոլորտ է: Անգամ գլխավոր դատախազ Լուիզա Օրտեգա Դիազն է արդեն հայտարարել, որ նորընտիր սահմանադրական ժողովն, ամենայն հավանականությամբ, կոչնչացնի Վենեսուելայում ժողովրդավարության մնացորդները։ Երկրի նախագահ Մադուրոն էլ իր հերթին շտապել է հայտարարել, որ պետք է վերացնել ու վերակազմակերպել գլխավոր դատախազի գրասենյակը։
Իշխանությունները հայտնել են, որ ընտրություններին մասնակցել է ավելի քան 8 մլն մարդ կամ ընտրողների 41 տոկոսից ավելին։ Ընդդիմադիրներն, իրենց հերթին, նշում են, որ մասնակիցների թիվը չի հասել 15 տոկոսի, իսկ դա այն նվազագույն շեմն է, որի դեպքում միայն, ըստ գործող օրենսդրության, ընտրությունները համարվում են կայացած։
Հայերը Վենեսուելայում հաստատվել են 20-րդ դարի սկզբին: Համայնք ձևավորվել է 1930-ականներին:
2009 թվականի տվյալներով` Վենեսուելայում բնակվում է շուրջ չորս հազար հա,յ մեծ մասը՝ Կարակասում: 2001 թվականին Կարակասի հրապարակներից մեկում տեղի հայ համայնքի հովանավորությամբ տեղադրվել է Մեծ Եղեռնի զոհերի հիշատակին նվիրված հուշարձան-կոթող:
Այստեղ հայախոս հայերի հիմա քիչ կհանդիպես, բայց մեր հայրենակիցներն էլ անցնում են բոլոր այն վտանգների միջով, որոնցով հղի է կյանքը Վենեսուելայում:
