ԵՐԵՎԱՆ, 31 հուլիսի — Sputnik. ԱԺ փոխխոսնակ Էդուարդ Շարմազանովը Sputnik Արմենիայի հետ զրույցում նշեց, որ Տավուշի մարզի սահմանամերձ գյուղերի վրա կրակոցներ արձակելը խստիվ դատապարտելի է։
«Սա ի ցույց է դնում Ադրբեջանի բարբարոսական էությունը։ Անթույլատրելի է ադրբեջանցիների տմարդի վարքագիծը. կրակահերթեր արձակելով՝ թույլ չտալ գյուղացիներին հավաքել իրենց բերքը։ Միջազգային կազմակերպությունները պարտավոր են արձագանքել այս հանցագործ գործելաոճին։ Սա ոչ այլ ինչ է, քան բարբարոսություն»,- նշել է Շարմազանովը:
Հիշեցնենք, որ մի քանի օր առաջ Ադրբեջանը խախտել է հրադադարի ռեժիմն ու Տավուշի մարզի Բարեկամավան, Չինարի, Բաղանիս գյուղերը կրակի պահել մի քանի ժամ շարունակ: Գյուղատնտեսությանը հսկայական վնաս է հասցվել այդ գյուղերում, մարդիկ ստիպված են եղել ընդհատել բերքահավաքը։
