Դիանա Հարությունյան, Sputnik.
Երկու օր առաջ լրահոսի թիվ մեկ լուրն էր: Ադրբեջանական կողմը խախտել է հրադադարի ռեժիմն ու Տավուշի մարզի Բարեկամավան և Չինարի գյուղերը կրակի տակ են եղել մի քանի ժամ: Կրակի դադարից հետո սկսեցին հաշվել վնասները: Չինարիում վնասվել է մանկապարտեզը, բնակելի տներին են փամփուշտները կպել, բայց ամենամեծ կորուստ գյուղի բնակիչ Տիգրան Վանյանն է կրել: Կրակը տարավ նրա 30 տարվա անասնագոմը, այն այրվել է ամբողջությամբ, ոչինչ չի մնացել:
Չինարիի գյուղապետ Սամվել Սաղոյանն արդեն ամեն բան հաշվել ու թվերը մարզպետարան է ներկայացրել: 12 մլն դրամ: Վերջին կրակոցների օրը հարևան գյուղից կոմբայն էին բերել, որ հացահատիկը քաղեն: Մնացել էր անքաղ միայն 4 հեկտարը: Այդ 4 հեկտարի ցորենը դեռ չեն շտապում հնձել:
«Նախորդ օրերը գյուղում հանգիստ են անցել: Ո՛չ խուճապ կա, ո՛չ անհանգստություն, սովորել ենք: 30 տարի այսպես ապրում ենք, էլի կապրենք: Կարևորը սահմանն ամուր ենք պահում, մեր ցորենն էլ ենք մշակում, մեր խաղողն էլ, միրգ ու բանջարեղենի պակաս չունենք»,- Sputnik Արմենիայի հետ զրույցում ասում է Սաղոյանը:
Հացահատիկի պակաս չունեն նաև Բաղանիսում: Սահմանային գյուղում, ուր մինչև վերջին տարիները անգամ մի հատիկ չէին ցանել, հիմա 25 տոննա հացահատիկ են հավաքել: Ճոճկանի ալրաղացում կաղան ու տարվա հացի խնդիրը լուծված է: Երիտասարդ գյուղապետը գրանցված հաջողությամբ այնքան ոգևորված է, որ անգամ սոցիալական ցանցերում կարելի է գտնել բերքահավաքի կադրերը: Ոգևորված են նաև Բաղանիսի գյուղացիները: Ափսոսում են պարզապես, որ ստիպված անմշակ են թողել այն 120 հեկտարը, որ հենց սահմանին է: Սահմանին մոտ 10 հեկտար ոռոգելի այգիները գյուղացիները կրակի տակ մշակում են:
![Սահմանամերձ Բաղանիսը ցորենի բերքահավաք է կատարում Սահմանամերձ Բաղանիսը ցորենի բերքահավաք է կատարում - Sputnik Արմենիա](https://cdn.am.sputniknews.ru/img/806/65/8066577_0:19:699:459_600x0_80_0_0_5c7b3958b4158a7f2939c4411dfc18fc.jpg)
![Սահմանամերձ Բաղանիսը ցորենի բերքահավաք է կատարում Սահմանամերձ Բաղանիսը ցորենի բերքահավաք է կատարում - Sputnik Արմենիա](https://cdn.am.sputniknews.ru/img/806/64/8066419_0:0:720:480_600x0_80_0_0_f2d3a4b0210679838a136412b4025196.jpg)
![Սահմանամերձ Բաղանիսը ցորենի բերքահավաք է կատարում Սահմանամերձ Բաղանիսը ցորենի բերքահավաք է կատարում - Sputnik Արմենիա](https://cdn.am.sputniknews.ru/img/806/63/8066359_0:240:720:720_600x0_80_0_0_b97fdbf71dac792839d4e08eaa8a4565.jpg)
![Բաղանիսի համայնքապետ Նարեկ Սահայկան Բաղանիսի համայնքապետ Նարեկ Սահայկան - Sputnik Արմենիա](https://cdn.am.sputniknews.ru/img/757/92/7579242_0:123:1599:1128_600x0_80_0_0_372130b6bc9c8cf090d1b26306151899.jpg)
«Գյուղատնտեսական աշխատանքները եռում են: Մենք ունենք արդեն թրթուրավոր տրակտոր, նվիրատվություն էր: Չունենք կոմբայն, դա էլ, որ ունենանք, էլ տարեցտարի մեր արդյունքին հասնող չի լինի: Թող որքան կուզեն, կրակեն, մենք մեր տնից գնացողը չենք»,- Sputnik Արմենիայի հետ զրույցում ասում է Բաղանիսի գյուղապետ Նարեկ Սահակյանը:
Հացը կրակի տակ ավելի ամուր է կապում հողին: Հակառակորդի ակտիվությամբ Հայաստանի սահմանային գյուղերում էլ չեն զարմացնի, առավել ևս՝ վախեցնի: Նրանց, ովքեր ասում են, թե գյուղերը դատարկվում են Չինարիի ու Բաղանիսի գյուղապետերն հրավիրում են Չինարի ու Բաղանիս: