ԵՐԵՎԱՆ, 31 Հուլիս — Sputnik, Դիանա Հարությունյան. Նման դեպք բնապահպանության նախկին նախարար Կարինե Դանիելյանը հիշում է 80-ականներին: Այդ ժամանակ, սակայն, ձկները վտառներով ոչ թե հավաքվում էին ափին, այլ ափ էին նետվում: Վարկածները շատ էին,բայց այդպես էլ իրականությունը չէր պարզվել:
«Հիմնական խնդիրն այսպիսի դեպքերում ջրի որակն է: Այն ժամանակ ասացին, թե թունաքիմիկատներով բեռնված ինքնաթիռ է ջուրն ընկել: Այդպես էր, թե չէ` ոչ ոք չի կարող ասել: Հիմա էլի միակ պատճառը կարող է ջրի որակը լինել, թեև, ըստ վերջին ուսումնասիրությունների, ճիշտ հակառակն է`Սևանի ջրի որակը լավանում է: Մանրաձկան ափ դուրս գալու պատճառ կարող է լինել Սևանից հսկայական քանակով ջրի բացթողումը: Նախկինում միայն սեյսմիկ վտանգի մասին էի անհանգստանում, բայց սա էլ է հնարավոր»,–մեզ հետ զրույցում տարբերակ է առաջ քաշում դոկտոր-պրոֆեսորը:
Այն, որ ջրի որակի փոփոխությունը կարող էր նման իրավիճակի պատճառ դառնալ համաձայն չեն բնապահպանության նախարարությունում: Կենսառեսուրսների կառավարման գործակալության հատուկ պահպանվող տարածքների բաժնի պետի տեղակալը ձկնաբան է: Նորայր Աբրահամյանը լուսանկարը չէր տեսել, բայց վստահեցնում է, որ ափին մոտեցել են կարասիկները: Տարվա այս եղանակին հենց կարասներն են ձվադրում, մեկ կարասը 250 հազար ձկնկիթ է տալիս, ու մանրաձկները դեպի տաք ջրերն են շտապում: Լավ կլիներ, իհարկե, որ իշխանն ու սիգը բազմանային նույն արագությամբ ու քանակով, բայց հիմա ափին մոտ ոչ մեկին չես տեսնի:
«Սևանի իշխանն ու Սիգը, այսինքն` էնդեմիկ տեսակները, սառը ջրերն են սիրում: Նրանք հիմա լճի խորքերում են: Մեծ հաջողություն կլիներ, որ թեկուզ ափին մոտ, բայց գոնե կողակ տեսնեինք այդ քանակությամբ, բայց, իհարկե, կողակի պոպուլյացիան վտանգված է »,–նշում է Աբրահամյանը:
Պարզվում է Սևանում ակտիվացել են փոքր ձկները`Արագաձկները: Ոչ դրանց, ոչ առավել ևս կարասի ու խեցգետնի բազմացումը Սևանում մասնագետներին չի ոգևորում: Ամեն նոր տեսակի հետ խախտվում է լճի էկոհամակարգը, գործընթացը կանգնեցնել չեն կարող:
«Ոչ օդի ջերմաստիճանը, ոչ լրացուցիչ ջրառը չեն կարող ազդել լճի էկոհամակարգի վրա: Մոնիթորինգ կա. 38 մլրդ խորանարդ մետր ջուր կա Սևանում, որքան տաք պիտի լինի, որ ազդի: 65 թվականին լիճը ծաղկեց, բայց դա էապես չազդեց ջրի որակի վրա»: Այլ հարց է, ըստ Աբրահամյանի, որ տարբեր գործոններ նպաստում են, որ ոչ թե սիգը, իշխանն ու կողակը բազմանան, այլ կարասը: Օրինակ՝ փոքր ՀԷԿ-երը սառը ջրեր սիրող իշխանի համար լուրջ վտանգ են:
