ԵՐԵՎԱՆ, 27 հուլիսի–Sputnik. Հանրային ծառայության մասին օրենքը նախատեսում է սահմանափակում հանրային ծառայողների և բարձրաստիճան պաշտոնատար անձանց համար՝ վճարովի այլ պաշտոններ զբաղեցնելու առումով, բայց օրենքում բացառություն կա։
«Բացառությունը նախատեսվում է այն կազմակերպությունների համար, որտեղ 75 տոկոսից ավելի պետությունն ունի մասնաբաժին։ Այդ դեպքում հանրային ծառայողները և բարձրաստիճան պաշտոնատար անձինք կարող են զբաղեցնել համապատասխան պաշտոններ որպես դիտորդ, տնօրենների խորհրդում, սակայն չեն կարող ստանալ վարձատրություն։ Հենց դրան է վերաբերում օրակարգային այս հարցը»,– ասաց արդարադատության նախարար Դավիթ Հարությունյանը։
Նախարարի ներկայացրած հաջորդ որոշման նախագծով` նախատեսվում է հայտարարագիր ներկայացնող անձանց կտրուկ ընդլայնում։ Այլ կերպ ասած` հայտարարագիր ներկայացնողների թիվը 3 անգամ մեծանում է։
«Մենք վերջերս կատարեցինք կարևոր քայլ, մասնավորապես, բացի բարձրաստիճան պաշտոնատար անձինք, ընդգրկել նաև բարձագույն պաշտոն զբաղեցնող անձանց ԱԺ–ում, քննչական ծառայությունում, դատախազությունում և այլն։ Մի կողմից ընդլայնելով ցուցակը, մյուս կողմից կիրառելու ենք խիստ վերահսկողական մեխանիզմներ, որոնք նախատեսում են վարչական, և, ըստ անհրաժեշտության, նաև քրեական պատասխանատվություն»,– ասաց Հարությունյանը։
Արդարադատության նախարարն առաջարկեց գործընթացն իրականացնել փուլ առ փուլ, մշակել համապատասխան վերահսկողական գործիքակազմ և հետո էլ ավելի ընդլայնել ցուցակը։
