ԵՐԵՎԱՆ, 27 հուլիսի — Sputnik. Միացյալ նահանգների սենատը որոշել է շարունակել պատժամիջոցների կիրառումը Ռուսաստանի դեմ, մինչդեռ ԱՄՆ նախագահ Դոնալդ Թրամփը հասկանում է, որ աշխարհաքաղաքական կարևոր գործընթացներում նա Ռուսաստանի լիարժեք աջակցության կարիքն ունի, համոզված է ամերիկագետ Սուրեն Սարգսյանը։
«Թրամփը ցանկանում է կարգավորել Ռուսաստանի հետ հարաբերությունները, քանի որ շատ հարցեր, այդ թվում՝ ահաբեկչության դեմ պայքարը, չի կարող առանց այդ երկրի իրականացնել, իսկ սենատը, պատժամիջոցները խստացնելով, կաղապարի մեջ է դնում նրան. Թրամփը պետք է հաշվետու լինի սենատի առաջ Ռուսաստանի հետ իր շփումներում՝ ներկայացնելու է ընդհուպ մինչև հեռախոսազանգերը»,- ասաց Սուրեն Սարգսյանը։
Պատժամիջոցները տարածվելու են գազի, նավթի ոլորտներում, ՆԱՍԱ-ի հետ գործակցության վրա, իսկ դրա արդյունքում, ըստ Սարգսյանի, տուժում է ոչ միայն Ռուսաստանը, այլև եվրոպական ու միջազգային կազմակերպություններ, որոնք ներգրավված են ՌԴ-ի հետ խոշոր ծրագրերում։ Նա նշեց, որ եվրոպական մի քանի ընկերություն արդեն իսկ խնդրել է պատժամիջոցները կիրառելիս հաշվի առնել իրենց շահերը։
Թրամփը կարող է օգտվել վետոյի իր իրավունքից և չընդունել Ռուսաստանի դեմ պատժամիջոցներ կիրառելու մասին սենատի որոշումը՝ հաշվի առնելով վերը թվարկած հանգամանքները։
«Հնարավոր է՝ Թրամփն օգտագործի վետոյի իր իրավունքը, հակառակ դեպքում տարաբնույթ անախորժություններն անխուսափելի լինեն»,- ասաց Սարգսյանը։
Նա վստահեցրեց, որ ռուս-ամերիկյան հարաբերությունների սրացումը լավ չի անդրադառնա նաև մեր տարածաշրջանի վրա։
Սարգսյանը հիշեցրեց, որ այդ երկու երկիրն էլ Մինսկի խմբի անդամ են, ռազմաբազաներ ունեն տարածաշրջանում և հույս հայտնեց, որ վիճակը ծայրահեղ բարդացման չի գնա։
