ԵՐԵՎԱՆ, 26 հուլիսի — Sputnik. Ռուսաստանը ԱՄՆ–ի նկատմամբ քաղաքական և տնտեսական համալիր միջոցներ կձեռնարկի, եթե ՌԴ–ի դեմ նոր ամերիկյան պատժամիջոցների մասին օրենքը ստանա սենատի աջակցությունը և ստորագրի նախագահ Դոնալդ Թրամփը, ՌԻԱ Նովոստիին հայտնել է Միջազգային հարցերով Դաշնային խորհրդի կոմիտեի նախագահի առաջին տեղակալ Վլադիմիր Ջաբարովը։
ԱՄՆ կոնգրեսի ներկայացուցիչների պալատը չորեքշաբթի 419 կողմ և 3 դեմ ձայնով ընդունեց Ռուսաստանի, Իրանի և ՉԺԴՀ դեմ պատժամիջոցների մասին օրինագիծը։ Այնուհետև փաստաթուղթը պետք է քննարկի սենատը, իսկ հետո, եթե այն հաստատվի, կուղարկվի նախագահին՝ ստորագրելու համար։ Նոր պատժամիջոցներն, ընդունման պարագայում, կարող են դառնալ 2014 թվականից հետո ամենամեծ ու համալիր պատժամիջոցները։
«Մենք հետաձգած միջոցների փաթեթ ունենք, ժամանակին աջակցեցինք ԱՄՆ–ի ղեկավարությանը, ուշադրություն չդարձրեցինք Նոր տարվա նախաշեմին Բարաք Օբամայի կատարած տգեղ քայլին։ Այն նախատեսում է ինչպես տնտեսական, այնպես էլ քաղաքական միջոցներ, և կընդունվի, եթե օրենքն աջակցություն ստանա սենատի և Թրամփի կողմից», – ասաց Ջաբարովը։
Նա կոչ արեց խուճապի չմատնվել նոր պատժամիջոցների մասին օրենքի ընդունման պատճառով։ Նրա խոսքով՝ ՌԴ և ԱՄՆ հարաբերություններն առանց այն էլ վատ վիճակում են գտնվում։
«Մեր հարաբերություններն առանց այդ էլ ցածր մակարդակի վրա են, առանձնահատուկ ոչինչ չենք կորցնում։ Մենք ինքնաբավ գերտերություն ենք»,– համոզված է սենատորը։
Ջաբարովը հավելել է, որ այժմ ԱՄՆ–ը ստիպված կլինի «հաշիվ պարզել Եվրոպայի իր գլոբալ դաշնակիցների հետ»։
«Այդ օրենքը ոտնահարում է ԵՄ–ի շահերը, ստիպում եռակի թանկ վճարել գազի դիմաց»,– հիշեցրել է սենատորը։
Կրեմլում հայտնել են, որ չափազանց բացասական են գնահատում օրինագիծը, իսկ ԵՄ–ում այն Վաշինգտոնի միակողմանի գործողություններ են անվանել։
