1968 թվականի փետրվար և մարտ ամիսներին բրիտանական հանրահայտ The Beatles քառյակի երաժիշտները, որոնց ոգեշնչում էր արևելյան փիլիսոփայությունն ու երաժշտությունը, ուղևորվում են Հնդկաստան: Փոլ Մաքքարթնիի հետ Հնդկաստան է մեկնում նաև դերասանուհի Ջեյն Էշերը. նրանք այն ժամանակ պաշտոնապես նշանված էին: Այնպես է ստացվում, որ Հնդկաստանից Անգլիա վերադառնալու ճանապարհին Փոլն ու Ջեյնը որոշում են մի քանի օրով հանգրվանել Թեհրանում:
Այդ քիչ հայտնի փաստի՝ Փոլ Մաքքարթնիի Թեհրան այցելության մասին ներկայացված է Ջեյն Էշերի janeasher-source.blogspot.com անձնական բլոգում, որտեղ տեղադրած է նաև այդ իրադարձության հետ առնչվող երկու լուսանկար: Ինչպես նշվում է բլոգում` լուսանկարները արված են Թեհրանում, 1968 թվականի մարտի վերջին: Պատկերներից մեկը իրանական մի ամսագրի շապիկն է, որտեղ ընդհանուր ֆոտոշարքով ներկայացվում են առանձին դրվագներ Փոլի և Ջեյնի թեհրանյան այցելություններից:
Նշենք, որ այդ կարճատև մասնավոր այցի շրջանակներում Փոլ Մաքքարթնին ցանկություն էր հայտնել հանդիպել նաև իրանցի ճանաչված փոփ երաժիշտների հետ և ունկնդրել նրանց կատարումները: Հանդիպումը կայացել էր, և ահա այդ հանդիպումից մի դրվագ է ներկայացնում Ջեյն Էշերի բլոգի հաջորդ լուսանկարը: Այստեղ պատկերված է Փոլ Մաքքարթնին՝ նարգիլեով, իսկ Փոլի կողքին կիթառ նվագողը փոփ երգիչ Վիգեն Տերտերյանն է:
Իրանահայ երգիչ, երգահան, կիթառահար և դերասան Վիգեն Տերտերյանը 1960-70-ական թվականներին շահական Իրանի ամենաճանաչված և սիրված փոփ-աստղերից մեկն էր, որին ժամանակակիցներն անվանել են «փոփ Սուլթան» կամ «Պարսից ջազի Սուլթան»: Վիգեն Տերտերյանը կատարել է իր երգերը հիմնականում պարսկերենով, ինչպես նաև՝ հայերեն և անգլերեն լեզուներով: 1979 թվականի իսլամական հեղափոխությունից հետո նա հեռացավ Իրանից՝ բնակություն հաստատելով ԱՄՆ-ում, Կալիֆոռնիա նահանգում, որտեղ էլ և ապրեց մինչև իր կյանքի վերջը: Վիգեն Տերտերյանը մահացել է 2003 թվականին, 74 տարեկան հասակում:
