ԵՐԵՎԱՆ, 26 հուլիսի — Sputnik. «Սասնա ծռերի» դատավարության ընթացքում խմբի անդամների փաստաբան Արա Զաքարյանին դատական կարգադրիչներն արգելեցին դատարանի դահլիճ մուտք գործել սուրճի, կոնֆետի ու հյութի տոպրակով՝ հայտարարելով, որ դրանք կարող են պոտենցիալ վտանգ ներկայացնող դատարանի համար։
Փաստաբանը նախ պահանջեց ապացուցել դրանց վտանգավոր լինելը, ապա՝ կազմել արձանագրություն այն մասին, որ դատական կարգադրիչներն իր մոտ գտել են վերոհիշյալ վտանգավոր իրերը։
Ի պատասխան կարգադրիչը նշեց, որ լրատվամիջոցներն արդեն արձանագրել են տեղի ունեցածը։
Արա Զաքարյանը հայտնեց, որ ընդմիջման ընթացքում խանութից սուրճ, կոնֆետ ու հյութ է գնել և փորձում է դարձյալ վերադառնալ դատարան, ապա, ապացուցելու համար դրանց անվտանգ լինելը, բացեց հյութի շիշն ու խմեց դրանից։
Դատական դեպարտամենտի ներկայացուցիչը հայտարարեց, որ արգելված իրերի օրենքով հաստատված ցանկ չկա, և դատական կարգադրիչն յուրաքանչյուր առանձին նիստի համար ինքն է իրավասու որոշել, թե որ իրն է պոտենցիալ վտանգ ներկայացնում։
Դատական նիստի երկրորդ հատվածում էլ դատարանի դահլիճ ջրի շշով մուտք գործեց նաև ամբաստանյալ Կարո Եղնուկյանը։ Դատավորը պահանջեց այն հանձնել կարգադրիչներին, ինչին ի պատասխան Եղնուկյանը հայտնեց, որ դա հատուկ թորած ջրով շիշ է, որն իր համար, առողջական խնդիրները հաշվի առնելով, բերում են տնից։ Դատավոր Արտուշ Գաբրիելյանը նախազգուշացում, ապա՝ 10 ժամով հեռացրեց նրան նիստերի դահլիճից։ Եղնուկյանի փաստաբանը դատավորի հասցեին բղավեց. «Դու դատավոր չես, դատարանն էլ մանկապարտեզ չէ» և լքեց նիստերի դահլիճը՝ մեկնաբանելով, որ առանց պաշտպանյալի իր ներկայությունն անիմաստ է։
«10 ժամը նշանակում է` առնվազն մեկ ամիս իմ պաշտպանյալը նիստին չի մասնակցի»,- արդեն միջանցքում նշեց փաստաբանը։ Այդ միջադեպից հետո դատավոր Արտուշ Գաբրիելյանը դարձյալ հայտարարեց ընդմիջում՝ նիստի հետագա ընթացքի համար որոշում կայացնելու համար։
Ի դեպ, նշենք, որ նիստի սկզբում նախազգուշացում կիրառվեց նաև մյուս ամբաստանյալների նկատմամբ՝ դատարանի նկատմամբ անհարգալից վերաբերմունքի համար, քանի որ նրանք դատավորի ներս մտնելու պահին ոտքի չէին կանգնել։
Նախազգուշացում չկիրառվեց միայն Պավել Մանուկյանի, Աշոտ Պետրոսյանի ու Արմեն Լամբարյանի նկատմամբ, որոնք առողջական խնդիրներ ունենալու հիմքով ազատված են ոտքի կանգնելու պարտավորությունից։
