ԵՐԵՎԱՆ, 26 հուլիսի — Sputnik. «Սասնա ծռերի» գործով դատական նիստերի դահլիճ մուտք գործելիս փաստաբաններին խուզարկելու՝ հսկիչ անցակետի աշխատակիցների պահանջը, ինչպես և նախորդ նիստերի ժամանակ, դժգոհության առիթ դարձավ։
Փաստաբան Հայկ Ալումյանը հրաժարվեց բացել պայուսակը՝ դատական դեպարտամենտի աշխատակիցներից պահանջելով հայտնել, թե ինչ արգելված իր են փնտրում։ Նրանք հրաժարվեցին հրապարակել արգելված իրերի ցուցակը՝ նշելով, որ այդպիսին կարող է համարվել ցանկացած մետաղական իր։
Ի պատասխան Հայկ Ալումյանը հրաժարվեց դատարան մուտք գործելուց։ Դատական նիստը մեկնարկեց 45 րոպե ուշացումով։
10 րոպե անց դատավոր Արտուշ Գաբրիելյանը հայտարարեց ընդմիջում՝ փաստաբանների ներկայացրած պահանջը խորհրդակցական սենյակում քննելու ու որոշում կայացնելու համար։
