ԵՐԵՎԱՆ, 26 հուլիսի – Sputnik. Հայաստանն ու Իսրայելն առաջիկայում կկարողանան լայնածավալ համագործակցություն եզրեր գտնել տարբեր ոլորտներում, Հայաստանի և Իսրայելի միջև դիվանագիտական հարաբերությունների հաստատման 25–ամյակի և Իսրայելի անկախության 69–ամյակին նվիրված երեկոյի ընթացքում ասաց Հայաստանում Իսրայելի արտակարգ և լիազոր դեսպան Էլիյախու Իերուշալմինը։
Դեսպանը ողջունեց երեկոյի բազմաթիվ հարգարժան ու բարձրաստիճան հյուրերին։
«Ինձ ու իմ կնոջ` Սուլամիթայի համար մեծ պատիվ է ողջունել ձեզ այստեղ`Իսրայելի անկախության առթիվ Հայաստանում առաջին ընդունելությանը։ Մեզ համար մեծ պատիվ է, որ այսօր մեզ հետ են տարածաշրջանային համագործակցության նախարար Ցախի Հանեգբին և այլ բարձրաստիճան անձիք», – ասաց դիվանագետը։
Այսօր Իսրայելը տոնում է անկախության 69–ամյակը։ Այս տարիների ընթացքում այդ երկիրը շատ բանի է հասել, մասնավորապես` գիտության, կրթության, բարձր տեխնոլոգիաների, բժշկության ոլորտներում, նաև հրեաների հայրենադարձության հետ կապված հարցերում, նշել է դեսպանը։
«Համոզված եմ, որ առաջիկայում Հայաստանն ու Իսրայելն այդ ոլորտում ակտիվ համագործակցություն կունենան։ Պարոն Հանեգբիի այցը ձեր հիանալի երկիր, նրա հանդիպումները Հայաստանի իշխանության ներկայացուցիչների հետ, մի շարք կարևոր փաստաթղթերի ստորագրությունը կարևոր քայլ են երկկողմանի հարաբերությունների զարգացման համար։ Մանավանդ այսօր, երբ մենք նշում ենք մեր պետությունների միջև հաստատված դիվանագիտական հարաբերությունների 25–ամյակը», – ասաց դեսպանը։
Իերուշալմինի խոսքով` նա ու իր տիկինը սիրահարվել են գեղեցիկ Հայաստան երկրին, որտեղ հիանալի ժողովուրդ է ապրում։ Դեսպանը խոստացել է առավելագույն ջանք գործադրել երկու երկրների ու ժողովուրդների հարաբերությունների ամրացման համար։
Իսրայելի ազգային տոնին ու երկու երկրների միջև դիվանագիտական հարաբերությունների հաստատմանը նվիրված երեկոյի ընթացքում ելույթ ունեցավ «Հայաստանի փոքրիկ երգիչներ» երգչախումբը։
