ԵՐԵՎԱՆ, 26 հուլիսի – Sputnik. Հայաստանը նախատեսում է խոշոր արևային էլեկտրակայան կառուցել մինչ 2019 թվականը, այսօր լրագրողներին ասաց ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանը։
Նրա խոսքով` ավելի վաղ Հայաստանի էներգետիկայի նախարարությունը մրցույթ է հայտարարել Գեղարքունիքի մարզի Մասրիկ գյուղում 55 Մգվ արևային կայանի կառուցման համար։ Ներկայացվել էր 20 դիմում, իսկ նախաորակավորման փուլն անցել է 10 աշխարհահռչակ կազմակերպություն:
«Հաղթողի անունը նախատեսում ենք հայտնել 2017 թվականին, իսկ ողջ պայմանագրային բազան պատրաստել մինչ 2018 թվականի առաջին եռամսյակի վերջը», – ասաց Հարությունյանը։
Կառուցումը պետք է սկսվի եկող տարում, իսկ ավարտվի կա՛մ նույն, կա՛մ 2019 թվականին։
Այլընտրանքային էներգիա ստանալու մասին առաջին խոսակցությունները Հայաստանում սկսվել են 2006 թվականին։ 2014 թվականին նախագիծը պետական աջակցություն ստացավ ու հաստատվեց Հայաստանի կառավարության կողմից։
Կառավարությունը նախատեսում է մինչ 2020 թվականը էներգիայի օգտագործումը կրճատել 38%–ով, և համապատասխանաբար, նվազեցնել էներգետիկ ծախսերը։ Հայաստանում ստեղծվել են բոլոր պայմաններն արևային էլեկտրակայանների տեղադրման համար։ Դրա համար հարկավոր չեն թույլտվություններ, ու ողջ գործընթացը ազատված է հարկերից։ Բոլոր պայմանները ստեղծվել են այդ ոլորտում ներդրումներ կատարելու համար։
Հայաստանում տվյալ պահին նախատեսվում է կառուցել վեց արևային էլեկտրակայան. Թալին քաղաքում, Գագարին, Մեծ Մասրիկ, Դաշտադեմ և Մերձավան գյուղերում։ Հայաստանի կառավարության կողմցից դեկտեմբերի 29–ին հաստատված նախագիծը հաշվարկված է 129 միլիոն դոլարի համար։
