ԵՐԵՎԱՆ, 24 հուլիսի — Sputnik. Մոտ մեկ տարի առաջ՝ վարչապետի պաշտոնը ստանձնելուց հետո, Կարեն Կարապետյանը պետական մարմինների ղեկավարներին հանձնարարեց օպտիմալացնել անհարկի ծախսեր կատարող ՊՈԱԿ-ներն (պետական ոչ առևտրային կազմակերպություն) ու ԾԻԳ–երը (ծրագրի իրականացման գրասենյակ):
Հանձնարարականից մոտ մեկ տարի անց, կառավարությունում թեև վստահաբար ասում են, որ վարչապետի հանձնարարականը կատարվել է, բայց դժվարանում են նշել, թե դրա արդյունքում որքան գումար է հաջողվել խնայել։
Ֆինանսների նախարարությունն ասաց, որ միասնական հաշվարկ գոյություն չունի. յուրաքանչյուր գերատեսչություն տիրապետում է միայն իր իրականացրած կրճատումների արդյունքներին։
Նշենք, որ կառավարության պաշտոնական կայքը ևս այդ հարցի հստակ պատասխանը չի տալիս։ Այս բաժնում հրապարակած տեղեկության համաձայն՝ այս տարի պետական բյուջեից 2 346 627 200 դամ է հատկացվել ՊՈԱԿ–ներին։ Գումարը բաշխվել է 8 կազմակերպությունների միջև, որոնցից 4-ը ԱԻՆ–ին, 4-ը կառավարության աշխատակազմին պատկանող ՊՈԱԿ–ներ են։ Պետական մյուս գերատեսչություններն առայժմ չեն հրապարակել իրենց ՊՈԱԿ–ների այս տարվա ծախսերը։
Համեմատության համար նշենք, որ նախորդ տարի նույն կայքում հրապարակած տեղեկության համաձայն՝ պետական բյուջեից ֆինանսական աջակցություն է ստացել 46 ՊՈԱԿ: Պետական բյուջեից դրանց ֆինանսավորումը կազմել է մոտ 7,5 մլրդ դրամ, ավելի կոնկրետ` 7 563 707 800։
Ի դեպ, մասնագետների համոզմամբ՝ ՊՈԱԿ-ների իրական ֆինանսավորումն, իրականում, գերազանցում է պաշտոնապես հրապարակած գումարի չափը։
«Այդ նույն գերատեսչությունները նաև արտաքին դրամաշնորհներ են ստանում ինչ–որ ծրագրերի իրականացման համար` վերապատրաստում և այլն, և դրանք ևս իրականացվում են նույն այդ ՊՈԱԿ–ների կամ ԾԻԳ–երի միջոցով»,– մեզ հետ զրույցում ասաց տնտեսագետ Արտակ Մանուկյանը, որը նույնպես վերջին տարիներին ուսումնասիրել է պետական կառույցների ծախսերի արդյունավետությունը։
Ի դեպ, Արտակ Մանուկյանը ևս փորձել է պարզել, թե ինչ արդյունքի է հանգեցրել վարչապետի հանձնարականը, բայց պետական մարմինների հրապարակային աղբյուրները, նա խոսքով, այդ ուսումնասիրությունն իրականացնելու հնարավորություն չեն ընձեռում։
Նշենք, որ, եթե ՊՈԱԿ–ների բյուջետային ծախսերը գոնե հրապարակվում են կառավարության կայքում, ապա ԾԻԳ–երի մասին նման տեղեկություն ընդհանրապես գոյություն չունի։
