ԵՐԵՎԱՆ, 24 հուլիսի – Sputnik. Իրանը հույս ունի Հայաստանի հետ համագործակցությունը օգտագործել Եվրասիական միության հետ հարաբերությունները խորացնելու համար, այսօր լրագրողներին ասաց արևելագետ Արմեն Իսրայելյանը։
Նրա խոսքով` երբ Հայաստանը միացավ ԵԱՏՄ–ին, փորձագետների շրջանում մտավախություններ առաջացան, որ դա կարող է խոչընդոտել հայ–իրանական առևտրային հարաբերություններին։
«Վերջին հայտարարությունները, սակայն, վկայում են այն մասին, որ պաշտոնական Թեհրանը ողջունում է Հայաստան-ԵԱՏՄ համագործակցությունը, ավելին՝ իրանական կողմը շահագրգռված է Հայաստանի միջոցով կապ հաստատել կառույցի անդամ երկրների հետ»,– ասաց Իսրայելյանը։
Նա պարզաբանեց, որ սա վերաբերում է ինչպես ընդհանուր ձեռնարկությունների ստեղծմանը, այնպես էլ Հայաստանի միջոցով ԵԱՏՄ շուկա դուրս գալուն։
Թեհրանը, Իսրայելյանի խոսքով, հիմա ակտիվորեն գործակցում է ԵԱՏՄ–ի հետ, այդ թվում նաև Հայաստանի միջոցով։
«Փորձ է արվում ԵԱՏՄ–ի հետ համաձայնության գալ որոշ ապրանքատեսակների համար մաքսային տուրքերի նվազեցման ուղղությամբ»,– ասաց Իսրայելյանը։
ԵԱՏՄ-ն միջազգային ինտեգրացիոն միավորում է, որը ստեղծվել է Մաքսային միության և միասնական տնտեսական տարածքի հիման վրա, գործում է 2015 թվականի հունվարի 1-ից։ Միությունը ստեղծված է ԵԱՏՄ երկրներում ծառայությունների, ապրանքների, կապիտալի և աշխատուժի ազատ տեղաշարժումն ապահովելու նպատակով։ ԵԱՏՄ անդամ են Ռուսաստանը, Հայաստանը, Բելառուսը, Ղազախստանն ու Ղրղըզստանը։ Փորձագետները տարբեր գնահատականներ են տալիս Հայաստանի՝ ԵԱՏՄ անդամակցության արդյունքներին։
