ԵՐԵՎԱՆ, 19 հուլիսի — Sputnik. Արցախի անցումային փուլի նախագահի ընտրությունը Սահմանադրության պահանջ է: Արցախը կառավարման համակարգ է փոխում 2017-ի Սահմանադրական փոփոխություններից հետո: Հիմա թիվ մեկ խնդիրն, իհարկե, քաղաքական համակարգերի փոփոխությունների հետևանքով անվտանգության հետ կապված խնդիրների բացառումն է: Այս մասին ասաց Sputnik Արմենիային հյուրընկալված Արցախի կառավարության խոսնակ Արտակ Բեգլարյանը։
Արցախի կառավարության խոսնակի կարծիքով` այս փուլի համար մեկ առաջնահերթությունն է այնպես անել, որ անցումային փուլն ինստիտուցիոնալ խզումների չհանգեցնի: Ըստ նրա, հատկապես, պատերազմական ռիսկի ու անվտանգության ապահովման խնդրի առաջ կանգնած Արցախին, անկախ համակարգերից, կայունություն է պետք:
«Քաղաքական գործընթացները պետք է նպաստեն անվտանգության համակարգի բարելավմանը: Կարևորը կուռ համակարգված իշխանությունն է: Երբ պետությունը հենված է լինում քաղաքական անձանց ու ոչ համակարգի վրա, վտանգը մեծանում է: Ոչ ոք չի կարող երաշխավորել ու համոզված լինել, որ ամեն անգամ նախագահական արդյունավետ թիմ է աշխատելու»,- ասում է Բեգլարյանը:
Նոր Սահմանադրությամբ Արցախն անցում է լիարժեք նախագահական կառավարման համակարգի: Իրականում, Բեգլարյանի կարծիքով, այս ձևակերպումն այնքան էլ իրենց համար չէ: «Որոշ դեպքերում Ազգային Ժողովն ավելի լուրջ լծակներ ունի, քան նախագահը: Օրինակ՝ խորհրդարանն առանց նախագահի ձևավորում է դատական համակարգը»,–ասում է Բեգլարյանը:
Որքանով այս համակարգը կնպաստի Արցախի անվտանգությանը, ցույց կտա ժամանակը, առայժմ Արցախում, անկախ քաղաքական գործընթացներից, ըստ Բեգլարյանի, կայունության դիրքերից են խոսում:
