ԵՐԵՎԱՆ, 19 հուլիսի – Sputnik. Արցախի նախագահի ընտրությունն առաջին քայլն է նոր Սահմանադրության իրականացման ճանապարհին, Sputnik Արմենիային ասաց Արցախի Հանրապետության մարդու իրավունքների պաշտպանը։
Նախագահի ընտրությունն անցկացվում է Ստեփանակերտում այսօր՝ հուլիսի 19–ին։ Հրավիրվել է Խորհրդարանի հատուկ նիստ, որի ընթացքում, առաջին հերթին, կներկայացվեն թեկնածուները, հետո կսկսվեն ընտրությունները։ Օրվա ավարտին հայտնի կդառնա Արցախի նախագահի անունը։ Նորընտիր նախագահը կպաշտոնավարի մինչև 2020 թվականը։
«Դա առաջին գործընթացն է, որը 2017 թվականին ընդունված Սահմանադրության արդյունքը դարձավ։ Այդ քայլը Սահմանադրության իրագործումն է, ոչ ավելին»,– ասաց Մելիքյանը։
Նրա խոսքով` Արցախի համար նախագահի ընտրությունը կարևորագույն իրադարձություն է, քանի որ դա պետական կառավարման նոր նորմերի ձևավորման ճանապարհին առաջին քայլ են։
Ինչ վերաբարում է ժամանակավոր նախագահի ընտրությանը ոչ թե համընդհանուր քվեարկությամբ, այլ Խորհրդարանի նիստով, նրա կարծիքով՝ դրանում ոչ մի զարմանալի բան չկա։
«Այդ քայլն ընտրել է հենց ժողովուրդը 2017 թվականի փետրվարին` մասնակցելով հանրաքվեի»,– նշեց մարդու իրավունքների պաշտպանը։
Արցախի նախագահի պաշտոնի համար երկու թեկնածու է առաջադրվել. Արցախի ներկա նախագահ Բակո Սահակյանը և «Շարժում – 88» Արցախի ԱԺ խմբակցության ղեկավար Էդուարդ Աղաբեկյանը։
2017-ին ընդունված Սահմանադրությամբ Արցախն անցել է պետական կառավարման նախագահական համակարգի, այսուհետև պետության գլխին կանգնած է նախագահը: Նա ընտրվում է ժողովրդի կողմից՝ ուղղակի ընտրությունների միջոցով, 5 տարի ժամկետով: Նույն անձը չի կարող ավելի քան երկու անգամ անընդմեջ ընտրվել հանրապետության նախագահի պաշտոնում: Համաձայն գործող օրենսդրության՝ ԱՀ նախագահը հանդիսանում է գործադիր իշխանության ղեկավար և զինված ուժերի գերագույն հրամանատար: Նա նշանակում է վարչապետին և հաստատում է կառավարության կազմը:
