ԵՐԵՎԱՆ, 18 հուլիսի — Sputnik. 7 երիտասարդ 6 երկրներից 7 օր անց են կացրել Հայաստանում՝ Աղվերանի «Կրիստալ Ռեզորթ» հյուրանոցային համալիրում, ծանոթացել միմյանց մշակույթներին, ավանդույթներին, լեզվական առանձնահատկություններին, տարբեր երկրներում առկա ուսման հնարավորություններին, նաև ներկայացրել են իրենց խոհանոցը, երգն ու պարը։
Ծրագրի գլխավոր նպատակն է մեկ գաղափարի շուրջ համախմբել տարբեր ազգություն ունեցող երիտասարդների, նպաստել տարբեր ազգերի ծանոթությանը, միջմշակութային շփմանը, հնարավոր համագործակցությանը։
Նախագծի մասնակիցները օտարազգի երիտասարդներ էին, սակայն կազմակերպիչները ներգրավել էին նաև Սփյուռքում երկար տարիներ բնակվող, հայկական մշակույթից օտարացած հայ երիտասարդների ևս։
«Լուսավոր ապագա» ՀԿ հիմնադիր-տնօրեն Մարիամ Կիրակոսյանը խոստովանեց, որ նախագիծն իրականացնելու ընթացքում հաճախ բախվել են միջմշակութային անհամաձայնությունների։
«Ըստ մեր ծրագրի ձևաչափի՝ մասնակիցներին պետք է տեղավորեինք «միջազգային» սենյակներում, ինչի հետևանքով ունեցել ենք քննարկումներ հայկական կողմի մասնակիցների հետ։ Նրանք, իհարկե, դեմ չէին գաղափարին, սակայն ունեին մտավախություն, որ հնարավոր է իրենց «մաստի» մարդ դուրս չգա սենյակի հարևանը։ Սակայն մենք բացատրեցինք, որ նման կերպ մասնակիցներին տեղավորելու հիմնական նպատակը հենց այն է, որ տարբեր ազգերի ներկայացուցիչներ ծանոթանան, հարմարվեն միմյանց առօրյային, փորձեն ընդհանուր հայտարարի գալ։ ՈՒրախությամբ պետք է նշեմ, որ ոչ մի խնդիր չի ունեցել ոչ մի սենյակի բնակիչ»,- ասաց նա։
Ինտերակտիվ 7-օրյա նախագիծը շատ հագեցած էր։ Մասնակիցներն ունեցան փորձի փոխանակում տարբեր թեմաների շուրջ, քննարկեցին և ցուցադրեցին իրենց ազգերին բնորոշ ժեստերի լեզուն։ Մասնակիցներից յուրաքանչյուրը չէր զլացել և իր հետ Հայաստան էր բերել իր երկրի տարազը։ Հոլանդական խմբը տարազ, օրինակ, մոտ 20կգ էր։
