ԵՐԵՎԱՆ, 13 հուլիսի — Sputnik. ՀՀ կառավարությունը մտադիր է գործունեություն ծավալել լուսնի և վրա արեգակնային համակարգի այլ երկնային մարմինների վրա։ Այդ նպատակով կառավարությունն այսօր հաստատեց «Լուսնի և այլ երկնային մարմինների վրա պետությունների գործունեության կարգավորման մասին» համաձայնագրի նախագիծն ու այն ուղարկեց ԱԺ։
Հարցը գործադրի նիստին էր ներկայացրել Կապի և տեղեկատվական տեխնոլոգիաների նախարարությունը։ Նախարար Վահան Մարտիրոսյանը հարցը նիստում չզեկուցեց։ Այն հաստատվեց առանց քննարկվելու։
Նախագծից պարզ է դառնում, որ Հայաստանի կառավարությունը որոշել է լուսինն ու երկնային այլ մարմիններն օգտագործել Հայաստանի կենսապայմանները բարելավելու, տնտեսական ու սոցիալական առաջընթացն ու զարգացումը խթանելու համար, և ամենակարևորը` բացառապես խաղաղ նպատակներով։
Լուսնի ու երկնային մարմինների հնարավորություններից օգտվելու համար Հայաստանը պետք է վավերացնի 1979 թ–ին Նյու Յորքում ստորագրված «Լուսնի և այլ երկնային մարմինների վրա պետությունների գործունեության կարգավորման մասին» համաձայնագիրը։
Հենց այդ համաձայնագրի վավերացման մասին նախագիծն էլ այսօր հաստատվեց ՀՀ գործադիր իշխանության կողմից ու ուղարկվեց օրենսդիր մարմնին։
Միջազգային համաձայնագրին միանալով` Հայաստանը պարտավորվում է նաև հրաժարվել լուսնի վրա կամ դրա ընդերքում զանգվածային ոչնչացման զենք, ռազմաբազաներ տեղադրելուց, զենք փորձարկելուց ու ռազմական զորախաղերի անցկացումից։
Համաձայնագրին միանալուց հետո Հայաստանը չի կարող նաև զավթել Լուսինն ու դրա վրա ինքնիշխանություն հռչակել։
