ԵՐԵՎԱՆ, 13 հուլիսի — Sputnik. Մինչ 2018թ–ը Հայաստանի ամբողջ տարածքում գործելու է համերգների և մշակութային այլ միջոցառումների տոմսերի գնման միասնական ավտոմատ համակարգ։ Այսօր կառավարության նիստում հայտարարեց մշակույթի նախարար Արմեն Ամիրյանը` ներկայացնելով համապատասխան որոշման նախագիծը։
Նոր առաջարկվող համակարգն, ըստ նախարարի, տեսանելի է դարձնելու մշակութային միջոցառմանը մասնակցելու ողջ ընթացքը` տոմսի գնումից մինչև դահլիճ մտնելն ու հանդիսատեսի աթոռին նստելը։ «Տեսանելի է լինելու, թե արդյոք հանդիսատեսը մտավ դահլիճ ու նստեց իր տեղը»,-ասաց նախարարը։
Համակարգի ներդրման արժեքը 500 000 – 1 մլն ԱՄՆ դոլար է։ Ոլորտի բարեփոխումը կիրականացնի մասնավոր ընկերությունը, որի ընտրության համար առաջիկայում մրցույթ կհայտարարվի։ «Ակնկալում ենք փորձ ունեցող կազմակերպությունների ներգրավվում»,– ասաց Արմեն Ամիրյանը։
Կառավարության հաստատած որոշման նախագծում, որպես դրա անհրաժեշտության հիմնավորում նշված է, որ ՀՀ–ում ներկայում տոմսերի վաճառքով զբաղվում են մի շարք տնտեսվարող սուբյեկտներ, որոնք գերազանցապես տոմսերն իրացնում են իրենց ցանցի կամ գործակալների միջոցով: Նրանց գործունեությունն այսօր պատշաճ չի վերահսկվում, քանի որ չկա մեկ միասնական համակարգ։ Արդյունքում չի բացառվում տոմսերի վերավաճառքն ու գնի անհիմն բարձրացումը, և այս ստվերային գործունեության հետևանքով տուժում է տոմս ձեռք բերողը։
Նոր համակարգում ընդգրկվել են թատերահամերգային, թանգարանային, սպորտային, ժամանցային ծառայություններ մատուցող կազմակերպությունները։
Նախատեսվում է այս տարի աշնանը միասնական համակարգ ստեղծել մայրաքաղաքի, իսկ մինչև տարեվերջ` ՀՀ ամբողջ տարածքում։
