ԵՐԵՎԱՆ, 13 հուլիսի — Sputnik. ԵՄ–ից Մեծ Բրիտանիայի դուրս գալու վերաբերյալ բանակցությունները, ահաբեկչության վտանգը, հունական ճգնաժամն ու զանգվածային միգրացիան` հիմնական մարտահրավերներն են, որոնք ծառացած են Եվրոպայի երկրների առջև։ Այդ մասին Երևանում տեղի ունեցած մամուլի ասուլիսի ժամանակ ասաց Հայաստանում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն։
«Եվրոպան պայքարում է անվտանգության համար։ Ահաբեկչության վտանգը դեռ կա, չնայած որ ԻՊ–ն արդեն մեծ կորուստներ ունի», – ասաց Շարպանտիեն։
Նրա խոսքով` մեծ եվրոպական ընտանիքի երկրներից յուրաքանչյուրն անվտանգության միջոցները տեղական մակարդակով է լուծում։
Եվրոպան խոր ճգնաժամ է ապրում. այս մասին վերջին մի քանի տարիների ընթացքում անընդհատ խոսում են փորձագետները։ Չեխիայի նախկին նախագահ Վացլավ Կլաուսը անցյալ տարվա սեպտեմբերին Հռոդոս կղզում ելույթ ունենալով «Քաղաքամրթությունների երկխոսություն» միջազգային հանրային ֆորումի 14-րդ նստաշրջանի ժամանակ` Շենգենն ամենամեծ սխալն էր անվանել։
«Եվրոպայի սահմանների պարզեցման գործընթացը մեծ սխալ էր։ Ես չեմ երազել ապրել առանց սահման, ես երազում էի ապրել սահմաններ ունեցող երկրում։ Երկաթե վարագույրը սահման չէր, և ես ուզում էի ազատվել դրանից, բայց ոչ սահմաններից», – ասել է Կլաուսը։
Նրա խոսքով` շենգեն գոտու ստեղծումն ապակայունացրեց իրավիճակը Եվրոպայում և դարձավ միգրացիոն ճգնաժամի հիմնական բաղկացուցիչներից մեկը, ինչը մինչ օրս չի լուծվում։
