ԵՐԵՎԱՆ, 13 հուլիսի – Sputnik. Ֆրանսիական խոշոր ձեռնարկությունները մեծ հետաքրքրություն են դրսևորում հայկական շուկայի նկատմամբ։ Այս մասին լրագրողների հետ հանդիպման ժամանակ ասաց ՀՀ-ում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն։
«Հետաքրքրությունը պայմանավորված է այն հանգամանքով, որ Հայաստանը ԵԱՏՄ անդամ է և համագործակցում է Իրանի հետ։ Ֆրանսիական ներդրողները մեծ ներուժ են տեսնում դրանում»,- ասաց դեսպանը:
Նրա խոսքով` ֆրանսիացի ներդրողները իրենց շատ լավ են զգում Հայաստանում, ասում է դեսպանը։
Ոչ միայն ֆրանսիական ներդրողները, այլ նաև տարբեր փորձագետները Հայաստանը դիտարկում են որպես տարանցիկ երկիր, որպես կամուրջ, որը կապում է Իրանի բազմամիլիոնանոց շուկան ԵԱՏՄ–ին, ԵԱՏՄ–ն` ԵՄ–ին, առանձին երկրները` Իրանի և նույն ԵԱՏՄ–ի հետ։
Այսպես, Հայաստանում Գերազանցության կենտրոն է բացվել` ազգային պոլիտեխնիկական համալսարանի հիման վրա, որը ստեղծվել է աշխարհահռչակ Schneider Electric ընկերության և «Տաշիր» ռուսական ընկերությունների խմբի մասնակցությամբ։
Կենտրոնի բացման շրջանակում քառակողմ համաձայնագիր են ստորագրել Հայաստանի ազգային պոլիտեխնիկական համալսարանը, «Շնեյդեր էլեկտրիկ», «Տաշիր» և «Հայաստանի էլեկտրացանցեր» ընկերությունները։ «Շնեյդեր էլեկտրիկը» չի թաքցնում, որ Հայաստանում լուրջ գործունեություն ծավալելու մտադրություն ունի։
Հայաստանում առաջին քայլերն են անում նաև ֆրանսիական SANOFI և SEVIER դեղագործական ընկերությունները։ Վերջին տարիներին Հայաստանում աշխատում են ֆրանսիական խոշոր ցանցային ապրանքանիշներ, օրինակ` Քարֆուրը։
Թեև դրական դինամիկա կա, այնուհանդերձ Հայաստանի և Ֆրանսիայի առևտրատնտեսական կապերն այդքան էլ լավ վիճակում չեն։ Մեր երկրների միջև տարեկան ապրանքաշրջանառությունը 50 միլիոն եվրո է կազմում։
