ԵՐԵՎԱՆ, 12 հուլիսի – Sputnik. Ռուսաստանի Դաշնության գլխավոր քննչական կոմիտեն ավարտել է 55–ամյա Արամ Պետրոսյանի նկատմամբ գործի հետաքննությունը, հայտնում է ntv.ru–ն։
Պետրոսյանը մեղադրվում է 206 (պատանդ վերցնել) և 205 (պայթյուն կատարելու սպառնալիք) հոդվածներով։
Հոգեբանական փորձաքննության արդյունքում 55–ամյա գործարարը մեղսունակ է ճանաչվել։
Հետաքննության ընթացքում Պետրոսյանը մասամբ ընդունել է իր մեղքը` տալով ցուցումներ, որոնք վկայում են այն մասին, որ նա գործել է իրեն վերագրվող հանցագործությունները։
Տվյալ պահին մեղադրական վճիռը հաստատելու հարցի քննարկումներ են ընթանում։
Պետրոսյանը խնդրել է փոխել պատժամիջոցը տնային կալանքով կամ երկրից չմեկնելու ստորագրությամբ, սակայն դատարանը մերժել է նրան։
Արամ Պետրոսյանը օգոստոսի 24-ին չորս պատանդ էր վերցրել Մոսկվայի կենտրոնում գտնվող «Սիթիբանկի» բաժանմունքում` սպառնալով պայթեցնել այն, սակայն հետագայում տղամարդը բաց էր թողել բոլոր պատանդներին և հանձնվել իրավապահներին: Առարկան, որը նա որպես ռումբ էր ներկայացրել, աղով լի տոպրակ էր:
Հարցաքննության ընթացքում Պետրոսյանը հայտնել է, որ ցանկանում էր իր արարքով ուշադրություն հրավիրել սնանկացումների խնդրին: Քննիչը Պետրոսյանին հանցագործություն կատարելու մեղադրանք է ներկայացրել «պատանդառություն երկու և ավելի անձանց նկատմամբ` որպես զենք առարկա օգտագործելով» հոդվածի համաձայն: ՌԴ ՔՕ-ի համաձայն` այդ գործողությունները պատժվում են 6-15 տարվա ազատազրկմամբ։ Փորձագետները մեղսունակ են ճանաչել Արամ Պետրոսյանին։
Զավթումից առաջ գործարարը Ռուսաստանի նախագահ Վլադիմիր Պուտինին ուղված տեսահաղորդագրություն է տարածել, որում պահանջել է ինստիտուտ ստեղծել, որը կզբաղվի սնանկության խնդիրներով։
